Myfyriwr doethuriaeth yn mynychu lansiad adroddiad seneddol ar newyn

Mae myfyriwr doethuriaeth a gyfrannodd dystiolaeth at adroddiad seneddol pwysig ar newyn yn y Deyrnas Unedig wedi bod yn Llundain yn lansio'r ddogfen ddilynol.

Mae doethuriaeth David Beck yn edrych ar dwf banciau bwyd yng Nghymru. Cafodd ei wahodd yn wreiddiol i rannu canfyddiadau ei ymchwil doethurol ger bron Grŵp Seneddol Trawsbleidiol ar Newyn. Cyhoeddodd y Grŵp Seneddol eu harchwiliad i newyn yn y Deyrnas Unedig ym mis Rhagfyr 2014.David Beck, myfyriwr doethuriaeth (chwith), gyda Frank Fields, AS Penbedw, yn mynychu lansiad yr adroddiad diweddaraf gan Grŵp Seneddol Trawsbleidiol ar Newyn

Roedd ei ymchwil, a gasglwyd o blith cyfweliadau â defnyddwyr banciau bwyd a gwirfoddolwyr ledled Cymru, yn dangos bod cysylltiad rhwng twf banciau bwyd a'r mesurau llymder a gyflwynwyd gan Lywodraeth y Deyrnas Unedig.

Daeth yr ymchwiliad i'r casgliad bod tlodi bwyd yn broblem wirioneddol yn y Brydain sydd ohoni, ac yn cynnig y dylid ffurfio corff yn seiliedig ar y "mudiad banciau bwyd", adrannau'r llywodraeth a'r ffigurau perthnasol eraill.

Defnyddiwyd ymchwil David unwaith yn rhagor wrth baratoi’r adroddiad dilynol a chafodd yr adroddiad hwnnw ei lansio yn San Steffan ddydd Iau, 10 Rhagfyr gyda chyflwyniad gan Justin Welby, Archesgob Caergaint.

Mae'n dangos bod y sefyllfa wedi gwella mymryn yn dilyn gwneud yr argymhellion cychwynnol, ond y bydd gwelliannau tymor hir efallai'n cymryd blynyddoedd lawer i'w cyflawni.

Cafodd David ei wahodd i'r digwyddiad lansio yn Portcullis House gan Frank Fields, AS Penbedw a chydawdur y ddau adroddiad, sef y gŵr y cyflwynodd David werth 18 mis o ymchwil iddo.

“Mae diffyg tystiolaeth ynglŷn â thlodi bwyd a thwf y banciau bwyd, a dyna pam y daeth APPG i gyswllt â fi”, eglurodd David sydd yn wreiddiol o Bolton. “Wrth wneud fy ymchwil daeth yn amlwg bod twf y banciau bwyd yn gysylltiedig â thwf mewn tlodi bwyd a'r ffaith nad oes gan bobl fynediad at ddigon o fwyd. Y rheswm pennaf dros hyn yw bod pobl yn dioddef oherwydd system fudd-daliadau gosbol.”

“Rhwng 1998 a 2010, o dan y Llywodraeth Lafur, roedd 16 banc bwyd yng Nghymru. Ers 2010, o dan y Llywodraeth Geidwadol, mae'r nifer wedi codi i 157.”

Mae David yn gwirfoddoli ym manc bwyd Eglwys Gadeiriol Bangor, sef un o blith nifer o fanciau bwyd lleol ac annibynnol a fynychodd y digwyddiad. “Yn y gynulleidfa roedd cyrff eraill hefyd a oedd wedi cyflwyno tystiolaeth, gan gynnwys y Grŵp Gweithredu ar Dlodi Plant, Cristnogion yn Erbyn Tlodi, FaresShare ac Ymddiriedolaeth Trussell. Roedd eu hymateb i'r lansiad yn ffafriol iawn.”

Mae David yn nhrydedd flwyddyn ei ddoethuriaeth, sy'n dwyn y teitl 'The Changing Face of Food Poverty'.

Dyddiad cyhoeddi: 17 Rhagfyr 2015