Neges gan Bennaeth Datblygu a Chysylltiadau Alumni
Unwaith eto, rydym ni ym Mhrifysgol Bangor yn paratoi ein hunain ar gyfer wythnos o seremonïau graddio ar ddechrau mis Gorffennaf. Yn ystod 10 seremoni, bydd tua 2,000 o fyfyrwyr yn derbyn eu graddau yn neuadd Prichard-Jones o flaen eu teuluoedd, eu ffrindiau a'u cyd-fyfyrwyr. Rydym yn edrych ymlaen hefyd at gydnabod cyflawniadau rhagorol deg unigolyn – pump ohonyn nhw'n gyn-fyfyrwyr Bangor – trwy ddyfarnu Graddau Anrhydedd yn ystod pob seremoni.
Mae hyn, wrth gwrs, yn rhan bwysig iawn o flwyddyn y Swyddfa Datblygu a Chysylltiadau Alumni – lle rydym yn croesawu carfan newydd o gyn-fyfyrwyr i'n rhwydwaith. Mae'r tîm bob amser yn cael wythnos wych yn siarad â graddedigion ac yn clywed am eu hamser yma fel myfyrwyr a'u cynlluniau ar gyfer y dyfodol. Mae'n wythnos mor hapus ac rydym yn edrych ymlaen yn fawr!
Cadwch lygad ar ein tudalennau LinkedIn, Facebook ac Instagram o 6 Gorffennaf i weld lluniau a straeon ein graddedigion newydd a’r sawl sy’n derbyn Graddau er Anrhydedd.
Dymuniadau gorau,
Emma Marshall
Pennaeth Datblygu a Chysylltiadau Alumni
NEWYDDION O'R BRIFYSGOL
Cyn-fyfyrwyr yn derbyn Anrhydeddau ar Ben-blwydd y Brenin
Llongyfarchiadau i bedwar o'n gyn-fyfyrwyr sydd ymhlith y rhai a anrhydeddwyd eleni yn rhestr Anrhydeddau Pen-blwydd y Brenin:
Alison Field (chwith), Llywydd y Gymdeithas Goedwigaeth Frenhinol, sy’n derbyn anrhydedd Aelod o Urdd yr Ymerodraeth Brydeinig (MBE) am ei gwasanaethau i goedwigaeth. Graddiodd gyda BSc mewn Coedwigaeth yn 1978 a dyfarnwyd iddi Radd er Anrhydedd gan Brifysgol Bangor iddi am wasanaeth cyhoeddus yn 2025.
Claire Vincent sy’n derbyn MBE am ei gwasanaeth i wyddor môr a’i gwasanaeth i ferched mewn gwyddoniaeth. Cwblhaodd radd BSc mewn Bioleg Môr yn 1988 ac MSc mewn Bioleg Môr yn 1990. Hi yw Dirprwy Gyfarwyddwr Is-adran y Môr a Physgodfeydd yn Adran yr Amgylchedd, Amaethyddiaeth a Materion Gwledig.
Timothy Hall FICfor, a raddiodd gyda BSc mewn Coedwigaeth yn 1990, sydd hefyd yn derbyn OBE, a hynny am wasanaethau i gadwraeth a choedwigaeth. Bu’n Bennaeth Ystadau a Rhaglenni yn Woodland Trust Scotland am 30 mlynedd ac mae’n Ymddiriedolwr i’r Borders Forest Trust.
Yr Athro Graham Baldwin sy’n derbyn anrhydedd Swyddog Urdd yr Ymerodraeth Brydeinig (OBE) am wasanaethau i addysg uwch. Cwblhaodd ei ddoethuriaeth mewn Ffisioleg Ymarfer Corff yn 2003 ac ar hyn o bryd ef yw Is-Ganghellor Prifysgol Canolbarth Swydd Gaerhirfryn.
Diweddariad Telethon y Gwanwyn
Mae'r Swyddfa Datblygu a Chysylltiadau Alumni yn falch o rannu canlyniad llwyddiannus ymgyrch Telethon Gwanwyn Cronfa Bangor, gyda'n tîm o fyfyrwyr yn cyflawni canlyniadau gwych wrth ymgysylltu â chyn-fyfyrwyr , a'u hailgysylltu â'u hen brifysgol.
Diolch i’n llu o gyn-fyfyrwyr sydd wedi addo £52,000 arall i Gronfa Bangor dros y pum mlynedd nesaf. Bydd y cyfraniadau hyn yn gwella profiad y myfyrwyr yn uniongyrchol drwy gefnogi bwrsariaethau, ysgoloriaethau, teithiau maes, mentrau cyflogadwyedd, gweithgareddau llesiant, projectau cynaliadwy, mentrau sy'n gwarchod yr iaith Gymraeg a diwylliant Cymru. Mae’r rhoddion yma yn darparu cefnogaeth hanfodol ac yn rhoi ymyl rhagoriaeth ychwanegol i brofiad myfyrwyr ar draws y Brifysgol.
Dywedodd Persida Chung, Swyddog Datblygu: “Nid yn unig y mae'r Telethon yn cyfoethogi profiad y myfyrwyr trwy alluogi mynediad at gyfleoedd a chefnogaeth werthfawr, mae hefyd yn creu llwyfan ystyrlon i'n myfyrwyr gysylltu â chyn-fyfyrwyr. Mae'r sgyrsiau hyn yn cryfhau cymuned ehangach y Brifysgol ac yn cynnig mewnwelediad, anogaeth a safbwyntiau go iawn i fyfyrwyr gan y rhai sydd wedi rhannu llwybrau tebyg. Rydym yn gwerthfawrogi ein cyn-fyfyrwyr a'n cymrodyr er anrhydedd a rannodd eu teithiau, eu profiadau a'u cyngor - cefnogaeth sy'n amhrisiadwy wrth i'n myfyrwyr baratoi i wneud penderfyniadau pwysig am eu dyfodol.”
I wybod mwy am yr ymgyrch delethon, cliciwch yma.
Diolch eto i'r rhai ohonoch chi sy'n rhoi!
Cronfa Bangor yn cefnogi mentrau cyflogadwyedd dan arweiniad myfyrwyr
Mae Cronfa Bangor wedi galluogi’r Ysgol Gwyddorau Amgylcheddol a Naturiol i gefnogi cyfres o fentrau arloesol dan arweiniad myfyrwyr drwy ei Gweithgor Cyflogadwyedd dan arweiniad Myfyrwyr.
Cefnogodd y cyllid ddau broject a gynlluniwyd i wella cyflogadwyedd, datblygu sgiliau ymarferol a chryfhau ymgysylltu cymunedol ymhlith myfyrwyr.
Canolbwyntiodd y cyntaf ar ymgysylltu cymunedol mewn partneriaeth ag Ardal o Harddwch Naturiol Eithriadol Ynys Môn a chefnogodd yr ail weithgaredd y gwaith o lansio cyfres o bodlediadau dan arweiniad myfyrwyr, gyda chyllid yn cael ei ddefnyddio i brynu offer recordio proffesiynol. Mae saith myfyriwr wrthi'n datblygu'r gyfres gyda mewnbwn gan gyn-fyfyrwyr, gyda lansiad ehangach wedi'i gynllunio ar gyfer mis Medi 2027.
Mae Cronfa Bangor yn cynnwys rhoddion gan gyn-fyfyrwyr ac mae'r Swyddfa Datblygu a Chysylltiadau Alumni yn gyfrifol am ei rheoli. Prif bwrpas y gronfa yw ychwanegu gwerth i brofiad y myfyriwr.
Cronfa Entrepreneuriaeth Graddedigion Bangor Santander X 2026
Mae Prifysgol Bangor, mewn partneriaeth â Santander Universities, yn cynnig tair grant o £5,000 i gefnogi entrepreneuriaid alumni i ddatblygu eu busnesau newydd.
Pwy all wneud cais?
Rydych yn gynnwys os:
o Rydych wedi graddio o Brifysgol Bangor
o Rydych wedi sefydlu busnes newydd yn y DU
o Mae eich trosiant blynyddol yn llai na £250,000
o Rydych yn cyflogi llai na 25 o staff
Sut gellir defnyddio’r grant?
Rydym am ddeall y gwahaniaeth y gallai’r cyllid hwn ei wneud i’ch busnes. Er enghraifft, gellir defnyddio’r grant ar gyfer:
o Gweithgareddau marchnata
o Datblygiad digidol
o Hyfforddiant a datblygu sgiliau
o Mynychu digwyddiadau hyrwyddo
Gwnewch gais nawr!
Cyflwynwch eich cais drwy blatfform Santander X erbyn 17 Gorffennaf 2026.
Aduniad i gyn-fyfyrwyr Eisteddfod Genedlaethol Cymru
Rydym yn falch iawn o gyflwyno Emyr Afan (Cymraeg, 1985), cynhyrchydd gweithredol teledu enillodd BAFTA, cyfarwyddwr amlw-gamera, ac arweinydd creadigolyn, fel ein siaradwr gwadd yn ystod ein haduniad cyn-fyfyrwyr yn yr Eisteddfod Genedlaethol.
Enillodd Emyr OBE yn 2024 ac yn Fusnes y Flwyddyn Caerdydd yn 2023, yn ogystal ag Entrepreneur y Flwyddyn (2024). Yn ddiweddar, penodwyd ef yn Llysgennad Busnes ar gyfer Ambiwlans Awyr Cymru, ac mae hefyd yn arloeswr gwyrdd, gan ennill gwobr arloesi cenedlaethol am ei system batri o'r enw Nessa. Fel Prif Weithredwr Afanti - un o gwmnïau cynhyrchu teledu hynaf a mwyaf llwyddiannus Cymru - mae hefyd yn cadeirio elusennau cerddoriaeth i bobl ifanc ac yn cynrychioli Cymru ar PACT. Bydd yn rhannu sut y lluniodd ei gyfnod ym Mangor ei daith i ddod yn ffigwr blaenllaw ym myd busnes ac arloesi Cymru.
Cynhelir yr aduniad blynyddol am 1.30pm ddydd Mercher, 5 Awst ar stondin Prifysgol Bangor yn yr Eisteddfod Genedlaethol yn Llantwd, gogledd Sir Benfro.
Cyfarfodydd Bangoriaid Llundain
Ers 1901, mae Bangoriaid Llundain wedi bod yn cwrdd i hel atgofion am eu dyddiau yn harddwch Gogledd Cymru, gwneud ffrindiau newydd ac ymweld â mannau diddorol.
Mae'r grŵp o gyn-fyfyrwyr yn dal i fynd 125 mlynedd yn ddiweddarach, gyda digon o ddigwyddiadau ar y gweill yn 2026 – a byddent wrth eu bodd yn croesawu aelodau newydd.
Noson anffurfiol mewn tafarn fydd eu cyfarfod nesaf ar 1 Gorffennaf am 7pm yn y man arferol, Mabel’s Tavern. Dewch os gallwch a chwiliwch am y bwrdd gydag arwydd coch Bangoriaid Llundain.
Mae'r grŵp hefyd yn trefnu teithiau dydd Sadwrn i Rochester a Twickenham yn ddiweddarach yn y flwyddyn a byddant yn ychwanegu rhagor o ddigwyddiadau at eu calendr yn fuan.
Mae Bangoriaid Llundain ar agor i holl raddedigion Prifysgol Bangor (mae aelodau’n cyfrannu £20 y flwyddyn i dalu am logi lleoliad y Cyfarfod Cyffredinol Blynyddol a chostau eraill). Am ragor o wybodaeth, anfonwch e-bost at James Tute ar londonbangorians@gmail.com neu ewch i'w gwefan.
Maen nhw’n gobeithio eich gweld chi’n fuan!
Cyfres Seminarau Seicoleg Celfyddydau John Shrigley
Cawsom noson wych i lansio ein cyfres ddarlithoedd cyhoeddus newydd ar Fai 27ain! Rhoddodd Dr Rebecca Chamberlain o Goldsmiths, Prifysgol Llundain, sgwrs agoriadol ddiddorol ar seicoleg lluniadu, gan archwilio'r hyn y gall y weithred o luniadu ei ddatgelu am gelf a'r artistiaid y tu ôl iddi.
Mae'r gyfres ddarlithoedd wedi'i gwneud yn bosibl diolch i rodd hael gan John Shrigley, cyn-fyfyriwr Ysgol Seicoleg Bangor (1974). Diolch yn fawr iawn i deulu Shrigley am wneud hyn yn bosibl!
Cynhaliwyd Dr Chamberlain gan Dr Awel Vaughan-Evans, Darllenydd mewn Seicoleg yma ym Mangor, sy'n arwain y modiwl poblogaidd "Harddwch a'r Ymennydd" yn y drydedd flwyddyn. Allwn ni ddim aros i weld beth sydd gan weddill y gyfres hon i'w gynnig!
Cyn-fyfyrwraig yn ennill medal Bobi Jones yn Eisteddfod yr Urdd
Dyfarnwyd Medal Bobi Jones (19–25 oed) i gyn-fyfyrwraig Prifysgol Bangor Katie Baddiley (Seicoleg, 2023) ar ddiwrnod agoriadol Eisteddfod yr Urdd Ynys Môn 2026.
Mae Medal Bobi Jones yn cael ei dyfarnu i unigolyn 19-25 mlwydd oed sydd yn dangos sut maen nhw’n defnyddio’r iaith o ddydd i ddydd drwy ateb cwestiynau am eu rhesymau dros ddysgu’r iaith, yr effaith mae dysgu’r Gymraeg wedi ei gael ar eu bywydau, a’u gobeithion ar gyfer y dyfodol.
Mae Katie yn wreiddiol o Nottingham ac fe symudodd i Fangor yn 2020 i astudio Seicoleg yn y Brifysgol a rŵan yn gweithio fel Swyddog Cymorth Cymunedol yr Heddlu (PCSO) yn Nyffryn Nantlle. Mae hi wedi newid cyfrwng iaith ei bywyd yn llwyr mewn amser byr, ac yn awyddus i helpu dysgwyr eraill ar eu taith.
Dywedodd Katie, “Dwi’n teimlo’n gryf y dylai unrhyw un sy’n gweithio mewn ardal Gymraeg efo’r cyhoedd ddangos parch drwy ymdrechu i siarad Cymraeg gyda nhw. Dwi wedi bod yn ddigon ffodus i fynychu cwrs yn Nant Gwrtheyrn ac i ddysgu Cymraeg drwy fy ngwaith. Dwi’n mwynhau canu yn y Gymraeg gyda Chôr Heddlu Gogledd Cymru. Hoffwn fagu plant sy'n rhugl yn y Gymraeg un diwrnod ac efallai ysgrifennu colofn yn y Gymraeg yn fy mhapur bro lleol.”
Da iawn Katie!
Panel alumni yn tynnu sylw at lwybrau gyrfa a sgiliau sy'n dod i'r amlwg
Cymerodd myfyrwyr ieithyddiaeth, iaith Saesneg a dwyieithrwydd ran mewn digwyddiad gyrfaoedd a chyflogadwyedd a amlygodd yr ystod eang o lwybrau gyrfa sydd ar gael i raddedigion.
Daeth y digwyddiad â myfyrwyr presennol ac alumni ynghyd sy’n gweithio ym maes busnes, cyfathrebu yn y sector cyhoeddus a thechnoleg iaith. Cynhaliwyd trafodaeth banel gyda’r alumni Georgina Merckel (Ieithyddiaeth, 2018), Ymgynghorydd Gweithrediadau Busnes a pherchennog Stiwdio North Wales; Laura Czerwinska (Saesneg a Llenyddiaeth Saesneg, 2019), Swyddog Cyfathrebu Arolygiaeth Gofal Iechyd Cymru; ac Albert Ventayol (Iethyddiaeth Gwybyddol, 2015), Peiriannydd Iaith sy’n gweithio gyda Meta.
Bu’r siaradwyr yn rhannu eu profiadau gyrfa ac yn trafod pa mor berthnasol yw’r sgiliau craidd a ddatblygir drwy astudio ieithoedd, gan gynnwys cyfathrebu effeithiol, meddwl yn feirniadol ac ymwybyddiaeth amlieithog. Trafododd y panel hefyd ddylanwad cynyddol deallusrwydd artiffisial a thechnolegau iaith, gan roi cipolwg gwerthfawr i fyfyrwyr ar sut mae’r offer hyn yn siapio arferion cyfredol a chyfleoedd yn y dyfodol ar draws amrywiaeth o sectorau.
Yn dilyn y drafodaeth, cwblhaodd y myfyrwyr weithgaredd myfyrio byr ar sgiliau cyn cymryd rhan mewn sesiwn rhwydweithio anffurfiol gyda’r siaradwyr. Rhoddodd hyn gyfle ar gyfer sgyrsiau un-i-un, gofyn cwestiynau a derbyn cyngor ymarferol.
Complete University Guide 2027: Bangor yn cyrraedd safle sydd yn y 50 uchaf yn y DU
Mae canlyniadau Prifysgol Bangor yn y Complete University Guide 2027 wedi cael eu cyhoeddi, gan nodi carreg filltir arwyddocaol yng nghynnydd diweddar y sefydliad. Mae Prifysgol Bangor wedi codi chwe safle, o 55 i 49 (allan o 130) yn nhabl cynghrair y Complete University Guide.
Mae'r perfformiad cryf hwn yn adlewyrchu gwelliannau ar draws nifer o fesurau allweddol a ddefnyddir yn y rhestrau. Mae sgôr gyffredinol Prifysgol Bangor wedi cynyddu 7%, wedi'i gefnogi gan well cyfraddau o ran myfyrwyr yn parhau, cymhareb staff-i-fyfyrwyr gwell, a lefelau uwch o foddhad myfyrwyr.
Mae Prifysgol Bangor hefyd wedi'i henwi fel y brifysgol orau yng Nghymru am yr ail flwyddyn yn olynol yn y University Compare Rankings 2027. Mae’r Brifysgol yn parhau i berfformio’n gryf ar lefel genedlaethol, gan gael ei gosod yn 17eg yn y Deyrnas Unedig a chadw’i lle ymhlith 20 prifysgol orau’r wlad. Mae hyn yn adlewyrchu cryfder cyson ar draws agweddau allweddol y profiad myfyrwyr.
Prifysgol yn cyrraedd safle uwch am gynaliadwyedd yn y QS World University rankings
Mae Prifysgol Bangor wedi cyrraedd safle uwch fyth am gynaliadwyedd yn y QS World University Rankings 2027.
Gwelwyd perfformiadau cryf ar draws nifer o ddangosyddion, gan gynnwys Cynaliadwyedd, a welodd y Brifysgol yn dringo 12 lle i safle 183 yn y byd. Rhwng popeth, cyrhaeddodd y Brifysgol safle byd-eang o 567, a safle 52 yn y Deyrnas Unedig.
Gwaith yn dechrau ar ail adeilad M-SParc
Mae gwaith wedi dechrau'n swyddogol ar yr ail adeilad ym Mharc Gwyddoniaeth Prifysgol Bangor, M-SParc, gan nodi carreg filltir bwysig i economi arloesi sy'n tyfu yng Ngogledd Cymru. Bydd datblygiad newydd Egni yn ehangu gallu'r parc i gefnogi busnesau, ymchwilwyr ac arloeswyr sy'n gweithio ar draws ynni carbon isel a thechnolegau uwch.
Disgwylir i'r adeilad newydd, sy'n cael ei gyflwyno gan Wynne Construction, gael ei gwblhau erbyn haf 2027. Bydd yn darparu swyddfa, labordy a gweithdy o ansawdd uchel, ochr yn ochr â chyfleusterau pwrpasol ar gyfer cydweithio, datblygu sgiliau ac ymgysylltu cymunedol.
Academydd o Fangor yn cael ei enwi ymhlith y mwyaf dylanwladol ym maes amgylcheddol y DU
Mae'r Athro Christian Dunn darlithydd gwlyptiroedd a Dirprwy Is-ganghellor Cynorthwyol dros Gynaliadwyedd wedi cael ei enwi'n un o'r 100 o weithwyr proffesiynol amgylcheddol mwyaf dylanwadol yn y Deyrnas Unedig.
Mae’r ENDS Report wedi cyhoeddi ei restr ddiweddaraf o'r 100 o weithwyr proffesiynol amgylcheddol yn y Deyrnas Unedig sydd wedi cael yr effaith fwyaf yn y sector dros y ddwy flynedd ddiwethaf.
Cafodd yr Athro Dunn, o’r Ysgol Gwyddorau Amgylcheddol a Naturiol ym Mhrifysgol Bangor, ei enwi'n un o'r 10 academydd gorau ar y rhestr am ei waith ar wyddoniaeth gwlyptiroedd ac atebion sy'n seiliedig ar natur. Tynnwyd sylw at ei waith am ddylanwadu ar wyddoniaeth amgylcheddol yn y Deyrnas Unedig.
Academydd wedi ei ethol yn Gymrawd Academi'r Gwyddorau Meddygol
Mae'r Athro Dyfrig Hughes, Athro Ffarmacoeconomeg yn Ysgol Feddygol Gogledd Cymru, wedi ei ethol fel Gymrawd o'r Academi'r Gwyddorau Meddygol.
Un o 60 o gymrodyr newydd, Mae'r Athro Dyfrig Hughes wedi'i ethol am ei waith dylanwadol ym maes asesu technoleg iechyd ac ymlynu wrth feddyginiaeth, sydd wedi helpu i lunio polisi gofal iechyd ar draws gwledydd y Deyrnas Unedig.
