Meddygaeth

5 Rheswm dros astudio Meddygaeth ym Mhrifysgol Bangor

Mae dewis ble i astudio Meddygaeth yn benderfyniad mawr. Ym Mhrifysgol Bangor, rydym yn cynnig profiad dysgu sy'n bersonol, yn ymarferol ac sydd wedi'i wreiddio yn y gymuned. O ddysgu dwyieithog ac addysgu mewn grwpiau bach, i leoliadau clinigol trochol yn un o ranbarthau harddaf y Deyrnas Unedig, dyma bum rheswm pam mae myfyrwyr yn dewis dechrau eu siwrnai feddygol gyda ni.

Rydym yn gwybod bod dechrau rhaglen Feddygaeth yn gam mawr. Mae'n un o'r graddau hiraf a mwyaf heriol y gallech eu gwneud, felly rydym yn sicrhau ein bod yn cynnwys cefnogaeth o'r cychwyn cyntaf. Mae tiwtor personol pwrpasol yn cael ei neilltuo i bob myfyriwr, ac mae ein timau academaidd bob amser wrth law i'ch tywys trwy'r heriau a'r cerrig milltir.

Mae ein dull dysgwr-ganolog yn golygu y byddwch yn elwa ar addysgu mewn grwpiau bach ac y byddwch mewn cysylltiad agos â’ch darlithwyr. Ym Mlwyddyn 1, byddwch yn archwilio straeon cleifion go iawn trwy Ddysgu ar Sail Achosion, a fydd yn eich helpu i gysylltu gwybodaeth wyddonol ag ymarfer clinigol ac i roi'r claf wrth wraidd eich astudiaethau.

Astudio meddygaeth yn Gymraeg yw cyfle i ddysgu a chyfathrebu yn eich mamiaith tra’n meithrin sgiliau meddygol hanfodol. Byddwch yn gallu darparu gofal clinigol yn hyderus i gleifion Cymraeg eu hiaith, gan gryfhau eich cysylltiad â’ch cymuned a’ch diwylliant. Mae gweithio’n ddwyieithog yn cynnig mantais glir, gan eich galluogi i gyfathrebu’n effeithiol, cydweithio’n llyfn gyda thîm meddygol, ac ennill profiad gwerthfawr a fydd yn eich paratoi ar gyfer gyrfa yng Nghymru neu ryngwladol.

Mae ein cyfleusterau'n cynnwys ystafelloedd hyfforddi rhithrealiti trochol, byrddau rhith-ddyrannu 'Anatomage', sgriniau fideo 3D di-wydr ac apiau symudol. Mae'r offer hyn yn caniatáu ichi ymarfer senarios clinigol prin, ond hanfodol, a chyfoethogi eich dealltwriaeth o anatomeg gan ddefnyddio'r dechnoleg ddiweddaraf.

Mae gogledd Cymru’n cynnig maes hyfforddi clinigol cyfoethog ac amrywiol, o bractisau meddyg teulu gwledig i senarios achub mynydd. Yn ystod Blwyddyn 2, Clerciaeth Integredig Hydredol Blwyddyn 3, a lleoliadau ym Mlynyddoedd 4 a 5, byddwch yn ennill profiad mewn meddygaeth anghysbell, gwledig a mynyddig. Un o uchafbwyntiau’r rhaglen yw ein Diwrnod Efelychu Iechyd Gwledig, a ddarperir mewn partneriaeth â’r Gwasanaeth Achub Mynydd, Gwasanaeth Ambiwlans Cymru, Sefydliad Brenhinol y Badau Achub, Gwasanaeth Tân ac Achub Gogledd Cymru, a staff arbenigol o’r brifysgol a’r Bwrdd Iechyd.

Ein Cyrsiau

SCROLL

Deon Meddygaeth Dr Nia Jones

"Croeso i Ysgol Feddygol Gogledd Cymru, lle mae tosturi, cysylltiad, ac atebolrwydd cymdeithasol yn llywio ein cenhadaeth. Drwy ragoriaeth mewn addysg, ymchwil effeithiol, ac ymgysylltiad ystyrlon â chleifion a chymunedau — gan barchu iaith a diwylliant — rydym yn gweithio gyda’n gilydd i wneud gwahaniaeth parhaol ym maes gofal iechyd."

a male student doctor wearing blue scrubs looking at an anatomical model of a skeleton

myfyriwr meddygol Jack Hamerton

"Rydym ni’n ffodus bod gennym ni gwrs bach sy’n gwneud i ni deimlo’n debycach i deulu na chwrs gradd safonol. Fy hoff ran o'r cwrs hyd yma yw cael amser personol gyda fy nhiwtor meddygaeth deuluol i deimlo'n hyderus yn fy sgiliau a fy ngallu fel myfyriwr meddygol.
Y peth rydw i'n edrych ymlaen ato fwyaf yw gallu ymroi’n llwyr i fy hyfforddiant a llwyddo i fod y meddyg rwy'n anelu at fod, gobeithio."

Fideo: Ysgol Feddygaeth Gogledd Cymru

Y broses achredu

Mae dyddiad dechrau rhaglen feddygaeth Ysgol Feddygol Gogledd Cymru yn 2024 wedi’i gytuno gyda’r Cyngor Meddygol Cyffredinol. Mae cwricwlwm Ysgol Feddygol Gogledd Cymru wedi'i ddilysu'n academaidd gan uned Ansawdd a Dilysu Prifysgol Bangor trwy broses sy'n cynnwys arbenigedd addysg feddygol allanol.

Mae holl ysgolion meddygol y Deyrnas Unedig yn cael eu hadolygu’n rheolaidd gan y Cyngor Meddygol Cyffredinol. Dyma’r corff rheoleiddio proffesiynol ar gyfer Meddygaeth sy’n gyfrifol am sicrhau safonau uchel ar gyfer addysg feddygol fel y disgrifir yn eu dogfen “Hyrwyddo rhagoriaeth: safonau ar gyfer addysg a hyfforddiant meddygol”. Yn ogystal, bydd y Cyngor Meddygol Cyffredinol yn craffu’n drwyadl ar bob ysgol feddygol newydd.

Mae Ysgol Feddygol Gogledd Cymru yn symud ymlaen drwy broses gymeradwyo'r Cyngor Meddygol Cyffredinol i ddyfarnu Cymhwyster Meddygol Sylfaenol. Bydd achrediad y Cyngor Meddygol Cyffredinol wedi ei gwblhau unwaith bydd y myfyrwyr cyntaf yn graddio.

Er mwyn amddiffyn myfyrwyr, rhaid i ysgolion meddygol newydd weithio gyda phartner ‘wrth gefn’, sef ysgol feddygol sefydledig sy’n gallu darparu cefnogaeth ac sy’n fodlon, os nad yw safonau ansawdd y Cyngor Meddygol Cyffredinol wedi eu cyrraedd am unrhyw reswm, i fyfyrwyr drosglwyddo a graddio o’r ysgol wrth gefn. Yr ysgol bartner wrth gefn ar gyfer Ysgol Feddygol Gogledd Cymru yw Ysgol Meddygaeth Prifysgol Caerdydd.

Fframwaith y cwrs

Y flaenoriaeth ym Mlwyddyn 1 yw rhoi sylfaen gref i chi yn y gwyddorau sylfaenol, sgiliau clinigol, cyfathrebu a phroffesiynoldeb. Byddwch yn dysgu am sylfeini gwyddorau meddygol ac yn datblygu'r sgiliau angenrheidiol i ddod yn feddygon cymwys. Mae'r rhaglen hefyd yn pwysleisio’r angen am gysylltiad cynnar â chleifion i wella’r dysgu a dealltwriaeth o senarios meddygol y byd go iawn.

Ym Mlwyddyn 2, byddwch yn cymryd rhan mewn gweithgareddau a phrofiadau dysgu amrywiol, gan gynnwys Dysgu yn y Gymuned a Chydrannau a Ddewisir gan Fyfyrwyr. Un uchafbwynt nodedig ym mlwyddyn dau yw'r Efelychiad Iechyd Gwledig, lle cyflwynir chi i heriau darparu gofal iechyd mewn ardaloedd gwledig o’u cymharu ag ardaloedd trefol. Byddwch yn ymarfer sgiliau clinigol a chyfathrebu wrth ymateb i argyfwng enghreifftiol ochr yn ochr â meddygon a pharafeddygon.

Ym Mlwyddyn 3 eich cwrs byddwch yn ymgymryd â Chlerciaeth Integredig Hydredol (LIC). Yn ystod y lleoliad clinigol hwn byddwch yn gweithio yn y gymuned ac mewn practis Meddyg Teulu am flwyddyn gyfan. Bydd hynny’n eich galluogi i ddilyn taith lawn y claf ym maes gofal sylfaenol ac eilaidd, a sylwi ar effaith cyflyrau meddygol a’u triniaeth ar gleifion.

Ym Mlwyddyn 4 y rhaglen, byddwch yn canolbwyntio ar achosion cynyddol arbenigol ac yn cymhwyso’r sgiliau craidd a ddysgoch ym Mlwyddyn 3 mewn gwahanol sefyllfaoedd clinigol. Rhennir y flwyddyn yn gyfleoedd dysgu lluosog, gan gynnwys lleoliadau clinigol arbenigol a’r Gydran a Ddewisir gan Fyfyrwyr.

Cynlluniwyd Blwyddyn 5 i integreiddio a pharatoi myfyrwyr meddygol ar gyfer y Rhaglen Sylfaen a'ch gyrfaoedd at y dyfodol fel meddygon yn y Gwasanaeth Iechyd Gwladol (GIG) neu astudiaethau ôl-radd pellach.

Diddordeb mewn Meddygaeth Mynediad i Raddedigion?

Mae yna ychydig o ofynion pwysig ar gyfer gwneud cais i feddygaeth i raddedigion y dylai darpar ymgeiswyr fod yn ymwybodol ohonynt. Rydym yn argymell yn gryf eich bod yn darllen y wybodaeth lawn am y cwrs i sicrhau eich bod yn deall yr holl fanylion.

Gwybodaeth am y Cwrs A101 Meddygaeth: Mynediad i Raddedigion)

Mae'n bwysig nodi y bydd angen i bob myfyriwr Meddygaeth Mynediad i Raddedigion (A101) ymgymryd ag Ysgol Haf tair wythnos o hyd cyn dechrau Cyfnod 1 y rhaglen hon. Rhaid i fyfyrwyr fynychu hon yn bersonol. Bydd hyn yn cynnwys sgiliau clinigol a chyflwyniad i ddysgu seiliedig ar achosion a bydd yn digwydd ym mis Awst cyn dechrau'r flwyddyn academaidd - fel arfer yn dechrau ar y dydd Mawrth ar ôl Gŵyl y Banc ym mis Awst.

Mae'r llwybr gradd hwn ar agor i ymgeiswyr sy'n cwblhau ein ffrydiau bwydo cydnabyddedig sydd i raddio gyda gradd Anrhydedd Ail Ddosbarth uwch o leiaf gydag un o'r cymwysterau canlynol:

BSc (Anrh) Ffarmacoleg Feddygol, Ysgol Feddygaeth, Prifysgol Caerdydd (B210)*
BSc (Anrh) Biowyddorau, Ysgol y Biowyddorau, Prifysgol Caerdydd (BC97)*
BMedSci (Anrh) Gwyddorau Meddygol, Prifysgol Bangor (B100)
BSc (Anrh) Gwyddorau Meddygol, Prifysgol De Cymru (B901)

Nid oes angen i ymgeiswyr o'r ffrydiau bwydo hyn sefyll arholiad mynediad ychwanegol.

Mae meini prawf mynediad eraill yn berthnasol, gwnewch yn siŵr eich bod yn darllen y gofynion mynediad yn llawn.

Gofynion Mynediad A101

Byddwn hefyd yn ystyried ceisiadau gan raddedigion rhaglenni gradd sy'n berthnasol i astudiaethau meddygol, gan gynnwys graddedigion Deintyddol.

Rhaid i ymgeiswyr:

fod wedi graddio gyda gradd Dosbarth Uwch o leiaf
fel arfer ddechrau'r cwrs o fewn 3 blynedd ar ôl graddio o'u gradd israddedig neu astudiaeth ôl-raddedig berthnasol. Gellir ymestyn y cyfnod hwn i'r rhai sy'n gweithio ar hyn o bryd mewn maes gofal iechyd perthnasol.*
cael eu hasesu ar sail Cydnabyddiaeth Addysg a Dysgu Blaenorol (RPEL) unigol, gan gynnwys asesiad o gymwysterau lefel 2 a 3, trawsgrifiadau gradd, profiad gwaith perthnasol ac asesiad gwybodaeth ffurfiol. Rhaid i'r asesiad RPEL ac asesiad o'r holl feini prawf eraill ddigwydd cyn yr arholiad mynediad a'r cyfweliad. Sylwch, er bod yr asesiad RPEL yn elfen annatod yn ein meini prawf llunio rhestr fer, nid yw bodloni'r meini prawf RPEL yn llwyddiannus ynddo'i hun yn gwarantu gwahoddiad i sefyll yr arholiad mynediad a'r cyfweliad.

Rhaid i ymgeiswyr gysylltu â'r Brifysgol i drefnu asesiad RPEL cyn cyflwyno cais UCAS. Darllenwch y gofynion mynediad yn llawn.

Gofynion Mynediad A101

Meysydd pwnc eraill sydd yn berthnasol

Efallai y bydd gennych ddiddordeb yn y meysydd pwnc yma hefyd.