5 Rheswm dros Astudio Gwyddorau Meddygol neu Wyddor Biofeddygol ym Mhrifysgol Bangor
Mae cwblhau gradd achrededig gan sefydliad gwyddoniaeth biofeddygol (neu yr IBMS) a lleoliad achrededig yn y GIG yn hanfodol ar gyfer cofrestru gyda’r Cyngor Proffesiynau Iechyd a Gofal (neu yr HCPC), ac yn aml yn ofyniad blaenorol ar gyfer nifer o rolau o fewn y GIG. Mae’r cwricwlwm ym Mangor wedi’i alinio’n benodol ac wedi’i achredu gan yr IBMS. Os ydych yn cwblhau gradd nad yw’n cael ei hachredu gan IBMS ac yn dymuno dod yn Wyddonydd Biofeddygol cofrestredig â’r HCPC, bydd angen i chi ofyn am asesiad gradd gan yr IBMS ac efallai y cewch eich cynghori i gwblhau modiwlau ychwanegol ar eich traul eich hun.
Yn ogystal â’ch paratoi ar gyfer rolau eraill ym maes gofal iechyd, megis Astudiaethau Cydymaith Meddyg, mae’r radd BMedSci mewn Gwyddorau Meddygol hon hefyd yn bwydo i fewn i’n cwrs Meddygaeth (Mynediad i Raddedigion).
Sylwch fod yn rhaid bodloni gofynion mynediad ychwanegol. Gwybodaeth lawn ar dudalen y cwrs.
Mae’r flwyddyn gyntaf gyffredin yn golygu bod gennych hyblygrwydd, waeth pa gwrs y byddwch yn ei ddechrau gyda ni, i ddilyn eich diddordebau wrth iddynt ddatblygu, gyda’r posibilrwydd o newid gradd ar ddiwedd y flwyddyn gyntaf. Mae ein graddau wedi’u seilio’n gadarn ar ymchwil ddiweddaraf, ac mae’r cynnwys yn cael ei ddiweddaru’n rheolaidd i sicrhau eich bod yn cael eich cyflwyno i flaen y gad ym maes sydd yn datblygu’n gyflym.
Bydd myfyrwyr yn cael profiad labordy o’r tymor cyntaf yn y flwyddyn gyntaf, gan roi cyfle iddynt ddatblygu sgiliau labordy gwerthfawr sy’n fuddiol ar gyfer gyrfa ym maes gwyddoniaeth. Mae ein labordai o’r radd flaenaf yn cynnwys cyfleusterau ymchwil o ddefnydd mewn gwaith ymchwil bioleg cellog ac moleciwlaidd â’r offer diweddaraf, labordy Pathogen Categori 2, a chyfleuster anatomeg dynol gyda thechnoleg delweddu 3D ac offer dadelfennu rhithwir.
Mae ein hysgol fach a chyfeillgar yn eich galluogi i adnabod ein staff academaidd yn dda ac i gael mynediad hawdd at gefnogaeth academaidd a bugeiliol i’ch gallugoi i berfformio are ich gorau. Ni fyddwch yn cael eich colli mewn darlithfa gyda channoedd o fyfyrwyr gan ein bod yn canolbwyntio ar addysgu mewn grwpiau bach – rydym yn eich adnabod yn gyflym ac yn sicrhau eich bod yn ffynnu ym Mangor.
Dewch o hyd i'r cwrs i chi
Mae’r flwyddyn sylfaen yn flwyddyn cyn dechrau blwyddyn gyntaf eich cwrs. Os nad oes gennych y cymwysterau angenrheidiol eto, neu os ydych eisiau meithrin eich hyder yn y pwnc, mae’r flwyddyn hon yn eich paratoi ar gyfer astudio ar lefel gradd. Byddwch yn datblygu eich gwybodaeth o’r gwyddorau meddygol yn ogystal â sgiliau hanfodol academaidd, ymchwil a labordy.
Beth yw’r gwahaniaeth rhwng Gwyddorau Meddygol a Gwyddor Biofeddygol?
Yn y rhaglenni Gwyddorau Meddygol a Gwyddor Biofeddygol, byddwch yn elwa o flwyddyn gyntaf gyffredin sy’n adeiladu sylfaen gadarn mewn bioleg dynol, ffisioleg, a’r egwyddorion sy’n sail i afiechyd. Mae’r flwyddyn gyffredin hon yn sicrhau bod pob myfyriwr yn meithrin gwybodaeth wyddonol hanfodol a sgiliau labordy cyn symud ymlaen i feysydd mwy arbenigol. Mae hyn hefyd yn rhoi hyblygrwydd, gan fod gan fyfyrwyr y gallu i drosglwyddo rhwng rhaglenni os ydynt yn dymuno gwneud hynny. Edrychwch isod i weld sut mae’r graddau hyn yn wahanol ac at ba gyfleoedd y gallent arwain.
Gwyddorau Meddygol
Mae Gwyddorau Meddygol yn canolbwyntio ar ddeall iechyd a salwch dynol o safbwynt clinigol a gwyddonol. Mae’n ddelfrydol ar gyfer myfyrwyr sydd â diddordeb yn sail fiolegol afiechyd ac ar gyfer y rhai sy’n ystyried gyrfa yn y maes meddygol neu ofal iechyd. Mae’r cwrs wedi’i fapio’n benodol i gwricwlwm cyn-feddygol ac yn archwilio strwythur a swyddogaeth prif systemau’r corff, yn ogystal â’r afnormaleddau sy’n arwain at gyflyrau fel diabetes, canser a chlefyd yr afu.
Mae graddedigion Gwyddorau Meddygol yn barod iawn ar gyfer amrywiaeth o yrfaoedd gwyddonol a meddygol. Mae’r radd yn cynnig sylfaen gadarn ar gyfer astudiaethau ôl-raddedig mewn Meddygaeth, Deintyddiaeth neu Wyddor Filfeddygol. Gall myfyrwyr sy’n cyflawni’n uchel symud ymlaen i raglen Meddygaeth: Mynediad i Raddedigion Bangor. Mae’r cwrs hefyd yn gam cyntaf rhagorol tuag at ein MSc mewn Astudiaethau Cydymaith Meddyg, yn ogystal ag at lwybrau clinigol eraill neu rolau ym maes iechyd cysylltiol.
Mae’r radd mewn Gwyddorau Meddygol yn canolbwyntio’n glinigol ac yn cael ei diweddaru’n gyson i adlewyrchu’r datblygiadau diweddaraf ym maes gofal iechyd ac ymchwil. Mae myfyrwyr yn meithrin dealltwriaeth ddyfnach o fecanweithiau afiechyd ac astudiaethau achos clinigol, gyda dull addysgu sy’n pontio’r bwlch rhwng gwyddoniaeth a meddygaeth.
Ar ôl y flwyddyn gyntaf gyffredin, bydd myfyrwyr Gwyddorau Meddygol yn archwilio pynciau sy’n unol â chwricwlwm cyn-feddygol o’r ail flwyddyn ymlaen. Byddwch yn astudio modiwlau sy’n seiliedig ar achosion clinigol ac yn cael mewnwelediad i strwythur a swyddogaeth prif systemau’r corff, yn ogystal â’r mecanweithiau sy’n sail i afiechyd. Mae’r addysgu’n cynnwys darlithoedd, tiwtorialau grŵp bach, a sesiynau anatomeg ddigidol gan ddefnyddio’r bwrdd Anatomage – offeryn blaengar ar gyfer dadelfennu rhithwir ac efelychu clinigol. Mae’r cwrs wedi’i gynllunio i bontio’r bwlch rhwng gwyddoniaeth a damcaniaeth ymarfer clinigol, gan eich paratoi ar gyfer astudiaeth bellach mewn meddygaeth neu ofal iechyd.
Gwyddor Biofeddygol
Mae Gwyddor Biofeddygol yn ymchwilio’n wyddonol i iechyd a salwch ar lefel gellog a moleciwlaidd. Mae’n cwmpasu amrywiaeth eang o ddisgyblaethau allweddol fel y’u nodir gan Sefydliad y Gwyddorau Biofeddygol, gan gynnwys geneteg, microbioleg, patholeg gell, imiwnoleg a gwyddorau gwaed. Mae’r cwrs hwn wedi’i gynllunio ar gyfer myfyrwyr brwdfrydig sydd â diddordeb mewn gwyddoniaeth labordy ac sy’n dymuno cyfrannu at gynnydd meddygol drwy ymchwil ac arloesedd.
Mae graddedigion Gwyddor Biofeddygol yn meddu ar y sgiliau angenrheidiol ar gyfer gyrfaoedd yn y GIG, cwmnïau fferyllol, sefydliadau ymchwil a chwmnïau biotechnoleg. Mae llawer yn mynd ymlaen i weithio mewn labordai clinigol, ymchwil feddygol neu gyfathrebu gwyddonol. Mae’r cwrs hefyd yn agor drysau i Raglen Hyfforddi Gwyddonwyr y GIG ac i rolau arbenigol eraill ym maes gofal iechyd a diagnosteg.
Ar y cwrs Gwyddor Biofeddygol, mae myfyrwyr yn archwilio bioleg afiechyd drwy gwricwlwm cryf sy’n seiliedig ar waith labordy. Mae’r cwrs yn cynnwys opsiwn i wneud cais am leoliad clinigol cystadleuol, sy’n cynnig profiad ymarferol wedi’i alinio ag arferion hyfforddi’r GIG. Mae’r dull ymarferol hwn yn sicrhau bod graddedigion yn barod ar gyfer amgylcheddau ymchwil a chlinigol fel ei gilydd.
Mewn Gwyddor Biofeddygol, byddwch yn mynd yn ddyfnach i ddeall sail foleciwlaidd a gellog afiechyd. Mae’r cwrs yn rhoi pwyslais cryf ar ddysgu yn y labordy, gyda modiwlau mewn geneteg, microbioleg, imiwnoleg a diagnosteg. Byddwch yn datblygu sgiliau ymarferol mewn technegau biofeddygol modern ac yn cael y cyfle i gwblhau prosiectau ymchwil. Mae myfyrwyr sy’n dilyn llwybr Gwyddor Biofeddygol Gymhwysol hefyd yn ennill profiad ymarferol wedi’i alinio ag hyfforddiant labordai’r GIG, gan wella eu cyflogadwyedd mewn lleoliadau clinigol a diagnostig.
Unrhyw gwestiynau? Sgwrsiwch gyda myfyrwyr a staff
Sgwrsio â Myfyrwyr a Staff Gwyddorau Meddygol
A oes gennych unrhyw gwestiynnau am fywyd myfyriwr ym Mangor? Mae ein llysgenhadon yn barod i’ch helpu gael yr ateb.
Gall ein myfyrwyr ddweud mwy wrthoch am y profiad o astudio yma, am y Clybiau a Chymdeithasau gwych sydd yma, a sut bu iddynt hwy wneud ffrindiau ac ymgartrefu yn y Brifysgol fel myfyriwr Gwyddorau Meddygol.
Os oes gennych unrhyw gwestiynau am y cwrs, mae ein darlithwyr wrth law i helpu. Dyma rai cwestiynau a ofynnir yn aml. Oes gennych chi unrhyw gwestiwn arall i'n darlithwyr?
- Pa rinweddau sydd gan fyfyrwyr Gwyddorau Meddygol llwyddiannus ym Mangor?
- Beth allai wneud i baratoi at astudio Gwyddorau Meddygol ym Mangor?
- Sut ydw i yn gwybod mai Gwyddorau Meddygol ym Mangor yw’r dewis iawn i mi?
Ein Hymchwil o Fewn Gwyddorau Meddygol
O fewn Ysgol Feddygol Gogledd Cymru, mae ein hymchwil yn defnyddio dulliau blaengar i fynd i’r afael â chwestiynau sylfaenol ym maes meddygaeth a/neu ddatblygu cymwysiadau i fynd i’r afael ag anghenion clinigol difrifol sydd heb eu diwallu. Ein nod cyffredinol yw gwella taith y claf – naill ai drwy gyfrannu mewnwelediad newydd i lenwi bwlch pwysig yn y wybodaeth feddygol neu drwy ddatblygu cymwysiadau sy’n cyfrannu’n uniongyrchol at wella iechyd a lles.
Mae gennym ffocws cryf ar ymchwil i ganser, lle mae ein timau ymchwil yn archwilio’r prosesau cymhleth sy’n arwain at ddatblygiad, cynnydd a gwrthiant therapiwtig mewn canserau. Rydym hefyd yn datblygu sylfeini ar gyfer therapïau newydd a thechnolegau monitro cleifion. Mae’r ymchwil flaengar hon yn bwydo’n uniongyrchol i’n haddysgu, a byddwch yn dod ar ei thraws yn eich modiwlau a addysgir – ac yn enwedig yn ystod eich prosiect ymchwil yn y drydedd flwyddyn – gan wneud ein graddau ymhlith y rhai mwyaf deinamig a chyfoes y gallwch eu hastudio.
Efallai y bydd gennych ddiddordeb yn y meysydd pwnc cysylltiedig hyn hefyd.
Efallai y bydd gennych ddiddordeb yn y meysydd pwnc cysylltiedig hyn hefyd.
