Fferylliaeth a Ffarmacoleg

Mae Fferylliaeth ym Mhrifysgol Bangor yn fwy na gradd — mae'n llwybr i broffesiwn gofal iechyd uchel ei barch lle byddwch yn gwneud gwahaniaeth gwirioneddol ym mywydau pobl. Mae'r rhan fwyaf o raddedigion yn mynd ymlaen i fod yn fferyllwyr trwyddedig, gan weithio mewn ysbytai, fferyllfeydd cymunedol, neu'r diwydiant fferyllol i sicrhau bod meddyginiaethau'n cael eu defnyddio'n ddiogel ac yn effeithiol.

I ddod yn fferyllydd, byddwch yn cwblhau cwrs gradd MPharm, ac yna blwyddyn hyfforddiant sylfaen ac arholiad cofrestru'r Cyngor Fferyllol Cyffredinol (GPhC). Byddwn yn eich cefnogi bob cam o'r ffordd, gan eich helpu i feithrin y wybodaeth, yr hyder a'r sgiliau clinigol i lwyddo.

Mae’r cwricwlwm Fferylliaeth ym Mhrifysgol Bangor wedi'i gynllunio o amgylch yr holl agweddau ar feddyginiaethau — o’u darganfod a’u datblygu i’w cyflenwi a gofal cleifion. Byddwch yn archwilio sut mae cyffuriau'n rhyngweithio â'r corff, sut y cânt eu llunio a'u rheoli, a sut mae fferyllwyr yn sicrhau diogelwch ac effeithiolrwydd mewn lleoliadau byd go iawn.

Mae’r claf wrth wraidd popeth. Byddwch yn dysgu i feddwl yn feirniadol am sut mae meddyginiaethau'n diwallu anghenion unigol, a sut mae fferyllwyr yn chwarae rhan hanfodol wrth wella canlyniadau iechyd.

Bydd eich addysg yn ymarferol, yn glaf-ganolog, ac wedi'i seilio ar brofiad go iawn. Byddwch yn ymgymryd â lleoliadau mewn fferyllfeydd a thebyg, yn gweithio mewn amgylcheddau efelychiadol, ac yn dysgu trwy weithdai, tiwtorialau a darlithoedd. Byddwch hefyd yn meithrin sgiliau ymarferol mewn labordai ac yn cael eich asesu trwy Arholiadau Clinigol Strwythuredig Gwrthrychol (OSCEs), gwaith cwrs, a phortffolios adfyfyriol - pob un wedi'i gynllunio i'ch paratoi ar gyfer realiti ymarfer proffesiynol.

Mae Ffarmacoleg yn agor y drws i amrywiaeth eang o yrfaoedd, o wneud ymchwil mewn labordy i swyddi sy'n ymwneud ag arloesi a llunio polisi gofal iechyd. Mae llawer o raddedigion yn dechrau yn y diwydiannau fferyllol a biotechnoleg neu drwy wneud ymchwil academaidd, ond mae cyfleoedd hefyd yn bodoli ym meysydd cyfathrebu gwyddoniaeth, ymgysylltu â'r cyhoedd, a materion rheoleiddio. Mae rhai ffarmacolegwyr yn cyfrannu at asesiadau technoleg iechyd y GIG, gan helpu i werthuso triniaethau newydd a gwella canlyniadau cleifion.

Mae Ffarmacoleg yn ymwneud â deall sut mae cyffuriau'n gweithio - o sut maent yn symud trwy'r corff (ffarmacocineteg) i sut maent yn cynhyrchu effeithiau (ffarmacodynameg) a'r risgiau posibl (tocsicoleg). Byddwch yn archwilio sut mae meddyginiaethau'n rhyngweithio â systemau biolegol a sut y gellir eu datblygu a'u gwella. Mae'r cwrs yn cyfuno damcaniaeth â phrofiad ymarferol yn y labordy, gan roi'r offer i chi i feddwl yn feirniadol a gweithio'n hyderus mewn amgylcheddau gwyddonol.

Mae’r radd BSc tair blynedd mewn Ffarmacoleg wedi'i datblygu gan ddefnyddio sylfaen wyddonol gref. Byddwch yn cymryd rhan mewn dosbarthiadau yn y labordy sy'n dod â theori’n fyw, wedi'u cefnogi gan ddarlithoedd, gweithdai a thiwtorialau. Mae asesiadau'n cynnwys arholiadau, gwaith cwrs, a gwerthusiadau ymarferol - pob un wedi'i gynllunio i'ch helpu i feithrin dealltwriaeth eang a chymhwysol o wyddor cyffuriau, a’ch paratoi ar gyfer gyrfa ym meysydd ymchwil, rheoleiddio, neu ddiwydiant.