Cymdeithaseg a Pholisi Cymdeithasol

Cymdeithaseg yw'r astudiaeth o natur gymdeithasol bodolaeth ddynol, sut mae cymdeithasau'n cael eu trefnu a sut rydym yn profi bywyd. Fel pobl rydym bob amser yn rhan o gysylltiadau cymdeithasol â'n gilydd. Trwy astudio Cymdeithaseg, byddwch yn gofyn cwestiynau heriol a chyffrous fel:

• Sut mae'ch galwedigaeth yn effeithio ar ba mor hir y byddwch yn byw?
• Sut mae rhywedd, crefydd a chefndir ethnig yn effeithio ar eich cyfleoedd mewn bywyd?
• Ydi gwrthdaro'n anochel?
• Beth sy'n rhoi 'hunaniaeth' i chi?
• O ble mae credoau a gwerthoedd yn dod?
• Ydi'r cyfryngau'n effeithio ar ein dewisiadau personol ynghylch ein ffordd o fyw?
• Ydi technoleg yn drech na'n gallu i'w reoli?

Gellwch hefyd astudio Cymdeithaseg trwy gyfrwng y Gymraeg ar y cwrs BA Cymdeithaseg gyda Pholisi Cymdeithasol.

Mae Polisi Cymdeithasol yn ymwneud â'r byd yr ydym yn byw ynddo a sut mae ein hanghenion o ran diogelwch a lles yn cael eu cyflawni. Byddwch yn edrych arno o safbwynt byd-eang, o'i wreiddiau ym Mhrydain oes Victoria i heriau tlodi byd-eang heddiw. Byddwch yn chwilio am atebion i gwestiynau fel:

• Sut rydym yn mynd i'r afael â thlodi ac anghydraddoldeb?
• Beth yw'r atebion i'r argyfwng tai?
• Beth fydd effaith newid yn yr hinsawdd ar bolisïau cymdeithasol?
• Beth yw swyddogaeth y wladwriaeth, sefydliadau'r sector gwirfoddol a phreifat a chymdeithas sifil wrth gyflawni amcanion Polisi Cymdeithasol?

Mae gan Brifysgol Bangor enw da'n rhyngwladol am ymchwil ryngddisgyblaethol ac arloesol yn ymwneud ag effeithiau arloesi, newidiadau cymdeithasol, datblygiadau gwleidyddol a pholisïau ar iechyd, iechyd meddwl, tlodi, gofal cymdeithasol a lles. Mae  ymchwil  a wneir gan ein staff academaidd ym meysydd Cymdeithaseg a Pholisi Cymdeithasol yn chwarae rhan bwysig wrth sicrhau statws Prifysgol Bangor fel un o sefydliadau ymchwil mwyaf blaenllaw’r byd.