Ansawdd a Safonau

Rhagarweiniad

Mae’r Brifysgol yn gyfrifol am safonau academaidd yr holl gymwysterau a ddyfernir yn ei henw, ac am ansawdd addysgu a dysgu myfyrwyr. Dros nifer o flynyddoedd mae Prifysgol Bangor wedi datblygu dull systematig ac integredig o reoli ansawdd a safonau academaidd, gan fabwysiadu amryw o ddulliau sicrhau ansawdd sydd wedi eu llunio i sefydlu, cynnal, monitro ac adolygu safonau academaidd y cymwysterau a gwella ansawdd y cyfleoedd dysgu ar bob pwynt cyflenwi, yn cynnwys darpariaeth ar y cyd mewn sefydliadau sy'n bartneriaid yn y DU ac yn rhyngwladol. 

Mae nifer o egwyddorion allweddol yn sail i ddull y Brifysgol o sicrhau ansawdd:

  • Senedd y Brifysgol, gyda chefnogaeth y Pwyllgor Addysg a Phrofiad Myfyrwyr a'i is-bwyllgorau, sydd â'r prif gyfrifoldeb am reoli safonau ac ansawdd academaidd;
  • mae'r Senedd yn cymeradwyo'r fframweithiau, polisïau a gweithdrefnau rheoleiddio sy'n ymwneud â sicrhau ansawdd ;  
  • ymrwymiad i hybu diwylliant o welliant parhaus wrth gyflwyno a rheoli rhaglenni ac yn yr amgylchedd dysgu;  
  • cysylltiad â myfyrwyr a rhanddeiliaid perthnasol drwy gynrychiolaeth briodol, ymgynghori a dulliau o roi adborth;
  • defnyddio pwyntiau cyfeirio allanol a mewnol perthnasol, yn cynnwys Cod Ansawdd yr Asiantaeth Sicrhau Ansawdd ar gyfer Addysg Uwch yn y Deyrnas Unedig, datganiadau meincnod pwnc a gofynion a disgwyliadau cyrff proffesiynol, statudol a rheolaethol.  
  • defnyddio arbenigwyr pwnc allanol wrth gymeradwyo ac  adolygu'r cwricwlwm ac wrth fonitro asesu;
  • cydnabod mai'r ysgolion sy'n gyfrifol am gyflwyno a rheoli rhaglenni. Mae'n ddyletswydd ar bob aelod o’r staff academaidd i ddarparu'r addysg a ddynodir iddynt, datblygu cwricwlwm a chefnogi myfyrwyr i’r safonau uchaf posibl. 
  • Mae gan ysgolion ddulliau cadarn i sicrhau ansawdd a gwella'r holl ddarpariaeth academaidd yn yr ysgol, yn cynnwys rhaglenni graddau ymchwil. 

Pwyntiau Cyfeirio Mewnol

Mae prosesau'r brifysgol i sicrhau ansawdd a safonau wedi'u nodi'n fanwl yn y Llawlyfr Ansawdd Academaidd, sy'n cynnwys cyfres o Reoliadau Academaidd, Codau Ymarfer, Canllawiau a Threfniadau.  Wrth weithredu'r prosesau hyn, mae'r brifysgol yn gallu dangos i gyrff allanol fel yr Asiantaeth Sicrhau Ansawdd a Chyngor Cyllido Addysg Uwch Cymru (HEFCW) bod ganddi drefniadau yn eu lle fel y gall weithredu ei chyfrifoldebau am ansawdd a safonau academaidd yn effeithiol. 

I grynhoi, mae'r brifysgol yn defnyddio'r dulliau sicrhau ansawdd canlynol i'r holl raglenni hyfforddedig: 

  • Dilysu ac ail-ddilysu gan gyfoedion, gyda mewnbwn oddi wrth staff academaidd o'r tu allan i'r brifysgol (arbenigwyr pwnc allanol) ac adolygiadau gan y brifysgol a myfyrwyr;  
  • Monitro'r rhaglen yn flynyddol, gan dîm y rhaglen;
  • Arholwyr Allanol i fonitro safonau academaidd;
  • Pwyllgorau'r ysgolion, colegau a'r brifysgol i sicrhau bod rheoliadau, polisïau a threfniadau yn cael eu craffu a'u defnyddio'n gyson, gyda mewnbwn oddi wrth staff academaidd a chynrychiolwyr myfyrwyr; 
  • Gwerthuso modiwlau a Phwyllgorau Cyswllt Staff-Myfyrwyr  yn darparu systemau ffurfiol fel y gall myfyrwyr roi sylwadau a chodi materion am weithrediad y rhaglen. 

Mae'r dulliau canlynol hefyd yn berthnasol i raglenni graddau ymchwil:

  • Arholwyr Allanol i fonitro safonau academaidd;
  • Pwyllgorau'r ysgolion, colegau a'r brifysgol i sicrhau bod rheoliadau, polisïau a threfniadau yn cael eu craffu a'u defnyddio'n gyson, gyda mewnbwn oddi wrth staff academaidd a chynrychiolwyr myfyrwyr; 

Cewch fwy o wybodaeth am ddulliau sicrhau ansawdd y brifysgol trwy'r cysylltiadau isod. 

Pwyntiau Cyfeirio Allanol

Yr Asiantaeth Sicrhau Ansawdd yw'r corff cenedlaethol sy'n gyfrifol am oruchwylio ansawdd academaidd sefydliadau addysg uwch Cymru.  Amlinellir disgwyliadau'r Asiantaeth Sicrhau Ansawdd yn yr UK Quality Code for Higher Education, sy'n sail wybodaeth fanwl i ddulliau sicrhau ansawdd y brifysgol ei hun.  Mae'r Asiantaeth Sicrhau Ansawdd yn adolygu holl sefydliadau addysg uwch Cymru bob chwe blynedd i gadarnhau eu bod yn cydymffurfio â disgwyliadau'r Cod Ansawdd, ar hyn a wnânt i gynllunio gweithgarwch gwella, ei ddatblygu a’i ddefnyddio. 

Y tro diwethaf i’r Brifysgol gael ei hadolygu oedd ym mis Rhagfyr 2024, ac adroddodd yr Asiantaeth Sicrhau Ansawdd ar ôl hynny:

Ar sail y wybodaeth a gyflwynwyd, mae’r tîm adolygu o’r farn:

  • Bod Prifysgol Bangor yn cyflawni gofynion Rhan 1 y Safonau a Chanllawiau Ewropeaidd ar gyfer sicrhau ansawdd mewnol.
  • Bod Prifysgol Bangor yn cyflawni gofynion rheoleiddiol sylfaenol perthnasol Fframwaith Asesu Ansawdd Cymru.

Dyma ddyfarniad cadarnhaol, sy'n golygu bod gan y Brifysgol drefniadau cadarn i sicrhau safonau academaidd, rheoli ansawdd academaidd a gwella ansawdd profiad myfyrwyr. Mae'n cadarnhau ymrwymiad y Brifysgol i ddarparu addysg o ansawdd uchel yn ogystal â bodloni meincnodau cenedlaethol Ewrop a Chymru ar gyfer safonau academaidd, cefnogaeth i fyfyrwyr a gwelliant parhaus.

Mae’r Adolygiad Gwella Ansawdd yn amlygu llwyddiant Prifysgol Bangor yn y gwerthusiad trylwyr hwn, ac yn cadarnhau ei lle fel arweinydd o ran darparu addysg ragorol a phrofiad eithriadol i fyfyrwyr, lle mae gwelliant yn ystyriaeth ganolog.

Nododd yr Adolygiad Gwella Ansawdd chwe chymeradwyaeth i Brifysgol Bangor, sef:

  • Partneriaeth â Myfyrwyr: Y berthynas gref rhwng y Brifysgol a’r myfyrwyr, lle mae barn ac adborth myfyrwyr yn flaenllaw mewn mentrau/projectau i gyfoethogi profiad myfyrwyr.
  • Y Gymraeg a Dwyieithrwydd: Y ffaith fod y Gymraeg a dwyieithrwydd wedi gwreiddio’n ddwfn yn niwylliant y Brifysgol i’r fath raddau, a hynny er budd amlwg yr holl staff a myfyrwyr mewn perthynas â chyfleoedd dysgu ac ymdeimlad o berthyn.
  • Cefnogi Myfyrwyr: Y gefnogaeth helaeth ac ymatebol sydd ar gael yn academaidd ac yn fugeiliol, er mwyn helpu i gefnogi anghenion myfyrwyr drwy gydol eu cyfnod yn y Brifysgol.
  • Datblygu Staff: Y gwerth mawr a roddir ar ddatblygu staff a’r modd y mae hynny wedi ei wreiddio’n llawn ar draws y Brifysgol, sydd o fudd sylweddol i allu staff a myfyrwyr i ddysgu.
  • Y Fframwaith Cywerthedd Asesu: Y ffaith bod y Fframwaith Cywerthedd Asesu yn cael ei gweithredu i sicrhau tegwch a chysondeb mewn arferion asesu o fewn disgyblaethau a rhwng disgyblaethau.
  • Gwelliant wedi ei Sbarduno gan Ddata: Y modd y caiff data ei integreiddio a’i ddefnyddio’n systematig i lywio prosesau sicrhau ansawdd, hwyluso cefnogaeth wedi'i theilwra i fyfyrwyr, a bod yn sail i welliannau wedi'u targedu.

Ni fu i’r tîm adolygu wneud unrhyw argymhellion.

Yn dilyn yr ymweliad adolygu, ar y cyd, mae'r Brifysgol ac Undeb y Myfyrwyr wedi datblygu Cynllun Gweithredu. Mae gwneud hynny’n rhan annatod o broses yr Adolygiad Gwella Ansawdd. Y Grŵp Adolygu Gwella Ansawdd fydd yn monitro sut y caiff y cynllun gweithredu ei roi ar waith, gan adrodd i’r Pwyllgor Addysg a Phrofiad Myfyrwyr.

Mae'r brifysgol hefyd yn sicrhau bod ei holl ddarpariaeth academaidd yn gyson â Fframwaith Credydau a Chymwysterau Cymru