Graddau Cyfrifiadureg Israddedig

Cewch eich dysgu gan arbenigwyr sydd yn ymwneud ag amrywiaeth o ymchwil ym maes cyfrifiadureg, ac yn gwneud defnydd o’r cyfleusterau rhagorol yma ym Mhrifysgol Bangor. Mae ein harbenigedd wedi ei ymgorffori yn ein dysgu ac felly yn rhoi mynediad uniongyrchol i chi i’r ymchwil ddiweddaraf. 
 

Cewch eich dysgu gan ddarlithwyr sydd am eich gweld yn ffynnu. Rydym yn gweld ein holl fyfyrwyr fel unigolion ac yn deall eu cryfderau. Mae drysau ein swyddfeydd bob amser yn agored i'n holl fyfyrwyr, p'un a ydynt yn dymuno trafod eu gwaith academaidd, eu damcaniaethau ymchwil neu gael sgwrs am fywyd. Mae unrhyw un sy'n dewis astudio gyda ni yn cael help pob cam o'r ffordd.

Rydym yn gymuned fywiog gyda labordai â chyfarpar da, cyfrifiaduron wedi eu rhwydweithio gan ddefnyddio meddalwedd o safon diwydiant a'n llyfrgell ein hunain. Mae gennym labordy rhwydweithio mawr - a gynlluniwyd i roi'r cyfle i ddylunio a gweinyddu rhwydweithiau a chefnogi'r gwaith o gyflwyno modiwlau pensaernïaeth gyfrifiadurol.  
 

Mae staff yn gweithio ar brojectau ar y cyd ac yn ymgynghorwyr mewn diwydiant. Yn aml, cynhelir projectau blwyddyn olaf mewn cydweithrediad â chwmni lleol - gan roi manteision i chi pan fyddwch yn chwilio am waith. Mae ein holl gyrsiau ar gael gyda blwyddyn ar leoliad.

Bydd gradd ym maes Cyfrifiadureg yn eich harfogi gyda'r holl sgiliau datrys problemau ac ymarferol y bydd eu hangen arnoch i ragori mewn gwahanol swyddi. Bydd Cyfrifiadureg yn eich rhoi ar y trywydd i gael gyrfa ddiddorol a chreadigol. Mae’n cwmpasu nifer o yrfaoedd i bobl greadigol sydd isio datrys problemau, arloesi a newid y byd.