Graddau Troseddeg a Chyfiawnder Troseddol Israddedig

Ym Mhrifysgol Bangor, mae troseddeg yn fwy na damcaniaeth yn unig, mae'n archwilio materion byd go iawn megis trosedd, cyfiawnder a diogelwch cymunedol. Mi fyddi’n mynd i’r afael â chwestiynau megis pam mae pobl yn cyflawni troseddau? Sut mae’r system gyfiawnder yn gweithio? Beth allwn ni ei wneud i greu cymunedau mwy diogel a thecach? O blismona a chosbi, i adsefydlu ac atal, mi fyddi’n ennill dealltwriaeth ddyfnach o sut mae cymdeithas yn mynd i'r afael â throseddu, a sut alli di droi dy wybodaeth yn weithredoedd a bod yn rhan o'r ateb.

Mae ein modiwl lleoliad gwaith yn caniatáu i ti ennill profiad gwerthfawr mewn diwydiannau sy'n gysylltiedig â throseddeg a chyfiawnder troseddol, gan roi hwb i dy CV a gwella dy gyflogadwyedd. Mae myfyrwyr blaenorol wedi gweithio gyda sefydliadau megis Cymorth i Ddioddefwyr a Chyngor ar Bopeth, gan ddatblygu sgiliau cyfathrebu a dysgu sut i reoli sefyllfaoedd heriol. Mae posib i ti hefyd ddewis ymgymryd â 'Blwyddyn Lleoliad Gwaith', gan weithio gyda sefydliad hunan-ffynhonnell sy'n berthnasol i dy astudiaethau, gan ennill mewnwelediad i'r byd go iawn a meithrin cysylltiadau gwerthfawr â'r diwydiant.

Mae dysgu yma yn fwy na darlithoedd a gwerslyfrau, mae'n ymarferol ac wedi'i gysylltu'n ddwfn â'r byd go iawn. O'r diwrnod cyntaf, mi fyddi’n cael cyfleoedd i wneud gwahaniaeth trwy fentrau megis Darllen a Thyfu, lle mae myfyrwyr yn cefnogi cyn-droseddwyr ar eu taith adsefydlu. Mae'r gwaith hwn yn mynd ymhell y tu hwnt i lythrennedd, mae'n ymwneud ag adfer urddas, herio stigma, ac agor cyfleoedd go iawn ar gyfer newid. Ochr yn ochr ag arwain projectau fel hyn, mi fyddi’n archwilio pynciau megis addysg, iechyd meddwl, a dosbarth cymdeithasol, gan ennill safbwynt ehangach a dealltwriaeth ddyfnach o sut mae trosedd yn effeithio ar gymdeithas.

Mae gradd mewn troseddeg yn agor drysau i ystod eang o yrfaoedd cyffrous ac ystyrlon. Rydyn ni’n canolbwyntio ar ddarparu’r offer, y sgiliau a'r cyfleoedd i ti adeiladu dyfodol sy'n gwneud gwahaniaeth. Mi fyddi’n graddio gyda dealltwriaeth ddofn o droseddu, ei achosion, a sut mae cymdeithas yn ymateb, a fydd yn dy baratoi i ymgymryd â swyddi ym meysydd plismona, carchardai, cyfnod prawf, cyfiawnder ieuenctid, gwaith cymdeithasol, amddiffyn plant, diogelwch, llywodraeth leol a chenedlaethol, cyrff anllywodraethol, elusennau, a thu hwnt.

Perthyn. Mi fyddi di’n teimlo dy fod yn perthyn o'r eiliad y byddi’n cyrraedd. O'r ffordd y mae pobl yn dy gyfarch i'r cynhesrwydd a'r gefnogaeth wirioneddol ar draws y campws, mae Prifysgol Bangor yn rhywle lle rwyt yn cael dy weld, dy gefnogi a dy ysbrydoli. Mae ein staff yn gyfeillgar, yn hygyrch, ac wir wedi buddsoddi yn dy lwyddiant. Mi fyddi’n cael tiwtor personol o'r diwrnod cyntaf, ac mae ein polisi drws agored yn golygu bod cymorth ar gael drwy’r amser. Y tu hwnt i’r gefnogaeth academaidd, mae ein timau ehangach yma i helpu gyda phopeth, o gyllid a thai, i iechyd a llesiant.