Gallai system wybodaeth 3D rhithrealiti newydd ar y we chwyldroi’r ffordd yr ydym yn gweld ac yn rhyngweithio â’n data, yn ôl yr arbenigwyr gwyddoniaeth gyfrifiadurol o Brifysgol Bangor a’i datblygodd.
Gellir cymhwyso gwaith ymchwil y tîm i faes 'Dadansoddeg Droch', wnaethpwyd ar y cyd a Phrifysgol Caer, i feysydd amrywiol iawn. Drwyddynt, fe ellir cyflwyno ac archwilio yr hyn y gall data ei ddysgu i ni mewn ymchwil wyddonol a'n bywydau bob dydd, i gyd mewn porwr gwe ar gyfrifiaduron personol, dyfeisiau symudol ac mewn cyfryngau rhithrealiti.
VRIA WebXR AR yn cael ei ddefnyddio
Gwnaed hyn yn bosibl gan y Dr Panos Ritsos a’r Dr Peter Butcher o Brifysgol Bangor, a gellir defnyddio eu system i greu haenau gwybodaeth wedi eu cynhyrchu gan gyfrifiadur yn seiliedig ar ddata. Gellir gweld yr haenau hyn ar ben nodweddion o’n byd diriaethol a hynny drwy ffôn clyfar neu ddyfais y gellir ei wisgo ar eich pen. Er enghraifft, gall defnyddwyr weld proffil ynni eiddo y maent ar fin ei rentu, neu’r data ynglŷn â throseddau ar y stryd honno - fel graffeg gyfrifiadurol a gaiff ei harddangos ar ben y tŷ neu'r stryd.
“Mae'n ymwneud â chreu haenau o wybodaeth sy’n seiliedig ar ddata ac y gellir eu harosod ar ben nodweddion ein byd diriaethol. Gall fod yn unrhyw fath o ddata sy'n gysylltiedig â lle penodol y gellir ei arddangos wedyn ar y sgrin a mynd ato pan rydych chi yn y lleoliad, neu o bell.
“Rydym ni'n creu teclyn lle gall pobl arddangos gwybodaeth mewn rhithrealiti pan nad ydyn nhw yn y lleoliad hwnnw mewn gwirionedd, neu mewn realiti estynedig pan maen nhw yn y lleoliad ond eisiau i brofiad y defnyddiwr gael ei wella gan wybodaeth wedi ei gynhyrchu gan gyfrifiadur."
Ers ei arddangos yng nghynhadledd delweddu data fwyaf y byd, mae eu gwaith, a alwyd yn VRIA - Virtual Reality Immersive Analytics neu Ddadansoddeg Drochi Rhithrealiti - wedi ei lawrlwytho fwy na 3,000 o weithiau.
Ychwanegodd Dr Ritsos, fu'n gyfrifol am oruchwylio'r gwaith: “Dyluniwyd VRIA i fod yn hygyrch i ddefnyddwyr newydd ac arbenigol. Nid yw ein gwaith yn ymwneud cymaint â chymwysiadau neu ddefnyddiau ond yn hytrach â chreu'r dechnoleg i eraill ei defnyddio, ac rydym ni wedi bod yn gweithio gyda phobl mor amrywiol ag eigionegwyr, amgylcheddwyr, a phersonél iechyd a diogelwch."
Adeiladu'r VRIA (Virtual Reality Immersive Analytics)
Dywedodd Dr Butcher, y datblygwr sy’n gyfrifol am VRIA: “Mae VRIA yn darparu ffordd rwydd i’r rhai sydd eisiau cael eu trochi yn eu data a defnyddio dulliau delweddu trochi newydd trwy eu porwr gwe.
“Mae'n arbennig o effeithiol mewn byd wedi ei effeithio gan bandemig lle gallwch chi greu a defnyddio'r profiadau hyn gartref yn hawdd iawn.
“Yn y dyfodol agos, bydd technolegau rhwydwaith, fel 5G, yn gwneud cymwysiadau o'r fath yn llawer amlycach ac yn haws ymgolli ynddynt. Rydym ni’n un o'r ychydig brifysgolion sy'n gweithio ar y dechnoleg flaengar hon, ochr yn ochr â sefydliadau fel W3C, Google, Microsoft a Mozilla."
Mae offeryn adeiladwr delweddu ar-lein VRIA ar gael fel gwasanaeth gwe. Mae'r offeryn hefyd yn cynnwys rhyngwyneb rhaglennu cymwysiadau (API) ar gyfer datblygwyr mwy profiadol. Mae'r cod ffynhonnell hefyd ar gael ar Github, cadwrfa boblogaidd ar gyfer codio cydweithredol.
I wybod mwy am gyrsiau Ysgol Gyfrifiadureg a Pherianneg Electroneg Prifysgol Bangor cliciwch yma
Mae Prifysgol Bangor yn cynnwys is-radd (BSc) Gwyddorau data a Delweddu
Gellir ddarganfod astudiaethau Ôl-raddedig Ysgol Gyfrifiadureg a Pheirianneg Electroneg Prifysgol Bangor yma
Dr Panos Ritsos a Dr Peter Butcher
