Datganiad Cenhadaeth

Ymwneud ag ymchwil, ysgolheictod, addysgu a dysgu ym maes gofal iechyd sydd o’r safon, ansawdd a gwerth gorau posibl i ddefnyddwyr gwasanaethau, ymarferwyr a budd-ddeiliaid, gan gynnal medrusrwydd ieithyddol a diwylliannol perthnasol i bartneriaid lleol, cenedlaethol a rhyngwladol.

Amcanion yr Ysgol Gwyddorau Iechyd

Hyrwyddo profiad addysgu a dysgu o ansawdd uchel i fyfyrwyr a staff, gan fabwysiadu’r dulliau addysgu a dysgu mwyaf priodol sy’n rhoi dewis, hyblygrwydd a chyfleoedd rhyngbroffesiynol i fyfyrwyr.
Paratoi a chefnogi ymarferwyr gofal iechyd i ymwneud â dysgu gydol oes ac ymarfer adfyfyriol a fydd yn hyrwyddo safonau uchel mewn ymarfer wedi’i seilio ar dystiolaeth.
Gweithio mewn partneriaeth â defnyddwyr gwasanaeth, darparwyr gofal iechyd ac asiantaethau, yn bennaf yng Nghymru, ond hefyd yng ngwledydd eraill Prydain ac yn rhyngwladol, ar ymchwil, addysg ac ysgolheictod ym maes gofal iechyd.
Ymwneud ag ysgolheictod ac ymchwil a gymhwysir at bolisi ac ymarfer gofal iechyd, er mwyn cloriannu ymarfer proffesiynol, a’i ddatblygu a’i wella lle bynnag y bo modd.
Dysgu medrusrwydd ieithyddol a diwylliannol i ymarferwyr gofal iechyd.
Sefydlu ymwybyddiaeth ieithyddol a diwylliannol mewn ymchwil ac ymarfer gofal iechyd ac ymateb yn sensitif i anghenion iaith siaradwyr Cymraeg.

Gwybodaeth i Sefydliadau Iechyd a Rheolwyr Gwasanaeth

Mae gan yr Ysgol Gwyddorau Iechyd draddodiad hir o weithio mewn partneriaeth â'r Gwasanaeth Iechyd Gwladol a chyflogwyr eraill, a gyda chynrychiolwyr cleifion a'r cyhoedd i gynllunio rhaglenni israddedig, ôl-raddedig a doethurol sy'n cael effaith ar fyfyrwyr a gwasanaethau fel ei gilydd. Rydym yn cydnabod fodd bynnag mewn rhai amgylchiadau bod angen rhaglenni mwy pwrpasol, wedi'u teilwra'n benodol i fynd i'r afael â heriau neilltuol ym maes gofal iechyd.

Mae systemau gofal iechyd yn gymhleth, ac mae heriau i'w gwella fel arfer yn amlweddog. Mae ein profiad ymarferol o gyd-weithio gyda gweithwyr proffesiynol a gwasanaethau iechyd, ynghyd â'n hymchwil i wella gofal iechyd, sydd gyda'r gorau yn y byd, yn golygu ein bod yn gallu cynorthwyo rheolwyr gwasanaethau i adnabod y mannau optimwm ar gyfer newid, a chanfod atebion ar sail tystiolaeth. Yn y modd yma gall rheolwyr gomisiynu amrediad o ymyriadau cefnogi wedi'u teilwra, ochr yn ochr â'n rhaglenni addysg a hyfforddiant, a all arwain at effaith real a chynaliadwy.

Ar sail ein profiad o ddarparu rhaglenni datblygu gweithlu a datblygu cyfundrefnol yng nghyd-destun arferion proffesiynol, rydym yn falch o gynnig yr egwyddorion canlynol a all fod o gymorth posib i reolwyr y Gwasanaeth Iechyd Gwladol ganfod atebion mwy pwrpasol i heriau gofal iechyd cyfoes:

Integreiddio datblygiad gweithlu a datblygiad cyfundrefnol - bydd hyn yn sicrhau bod y cynnydd yng ngwybodaeth a sgiliau staff drwy addysg a hyfforddiant yn gallu cael ei ddefnyddio'n effeithiol.
Defnyddio gwahanol ddulliau ysgogi i ennill cefnogaeth staff er mwyn cymell ymrwymiad ac effaith o fuddsoddi mewn rhaglenni datblygu gweithlu.
Tynnu ar yr ystod lawn o atebion i greu gwelliant - nid oes un ateb syml a all sicrhau newid cymhleth. Gall yr atebion hyn gynnwys cyrsiau hyfforddiant traddodiadol, mentora a chefnogaeth i reolwyr gwasanaethau, datblygu arweinyddiaeth, datblygu sgiliau, hwyluso systemau ac ail-lunio gwasanaethau, cefnogi newid ymddygiad proffesiynol, a chefnogi ymyriadau cyfundrefnol fel arolygaeth glinigol, meincnodi a rhwydweithio gyda chyfoedion.
Defnyddio datblygiadau mewn arferion rhyngbroffesiynol - bydd hyn yn symud y ffocws at le mae angen lleoli gwybodaeth a sgiliau, yn hytrach na swyddi proffesiynol, o fewn gwasanaethau.
Defnyddio fframwaith cyfundrefnol yn gyson i integreiddio datblygiad gweithlu a datblygiad gwasanaethau - bydd hyn yn galluogi eich sefydliad i barhau i ddysgu am 'yr hyn sy'n gweithio' o ran gwella gofal iechyd.

Os hoffech ymchwilio i'r potensial o ganfod atebion pwrpasol i heriau gofal iechyd, yna cysylltwch â'r Ysgol i drefnu trafodaeth. Cysylltwch os gwelwch yn dda â Gill Roberts ar 01248383544 gillian.roberts@bangor.ac.uk.