Croeso

Mynyddoedd di-ri, traethau euraidd, parc cenedlaethol, llynnoedd, afonydd a dyfroedd arfordirol arbennig o lân – ’does ’na ddim llawer o brifysgolion all frolio bod â’r rhain i gyd ar stepen eu drws! Os ydych chi’n fyfyriwr, yn aelod staff neu’n ymwelydd, mae amgylchedd y Brifysgol yn siŵr o greu argraff.

Rydym yn hynod falch o’n hamgylchedd ac ym Mhrifysgol Bangor, rydym wedi ymroi’n i’w amddiffyn a’i wella. Mae hyn yn golygu ein bod yn ystyried yr effaith y gall popeth yr ydym yn ei wneud ei gael, ac o safbwynt amgylcheddol, yn ystyried a allwn wneud rhywbeth yn well. Gydag ystâd o dros 100 o adeiladau wedi eu lleoli ar draws 346 hectar, yn ogystal ag oddeutu 10,000 o fyfyrwyr a 2,000 o staff, rydyn ni’n cydnabod oblygiadau ein heffaith ar yr amgylchedd.

Cynaliadwyedd, Prifysgol Bangor

Mae bod yn brifysgol wirioneddol gynaliadwy yn golygu nid yn unig edrych ar ôl ein hadnoddau naturiol a’r amgylchedd – mae’n golygu gofalu am ein cymunedau, ein diwylliant a’n hadnoddau economaidd. Gwaith y Grŵp Strategaeth Cynaliadwyedd yw goruchwylio’r dasg o ddatblygu a gweithredu Agenda Cynaliadwyedd Prifysgol Bangor, ac am adrodd i’r Pwyllgor Gweithredu. Am fwy o wybodaeth ar yr agenda cynaliadwyedd ehangach ym Mhrifysgol Bangor, ewch i dudalennau gwe Cynaliadwyedd. Mae ein ffrydiau cynaliadwyedd a’r hyn rydym yn gweithio arno i’w gweld yma, ac mae rhestr o’n Polisïau, Strategaethau ac Adroddiadau hefyd ar gael i’w gweld.

System Rheoli Amgylcheddol

Rydym wedi datblygu System Rheoli’r Amgylchedd (EMS) ffurfiol i gefnogi ein hymrwymiad i sicrhau gwelliant amgylcheddol parhaus. Mae’r EMS yn gysylltiedig â’r safon amgylcheddol ISO14001:2015, a gellir gweld yr arweiniad i hyn yn ein Tudalennau System Rheoli’r Amgylchedd, sydd hefyd yn cynnwys ein Targedau Amgylcheddol.

Mae Tîm Perfformiad Amgylcheddol y Campws wedi cael ei sefydlu er mwyn sicrhau cymaint o ymwneud a chynnwys budd-ddeiliaid â phosib. Mae gwybodaeth bellach yn ymwneud â’n EMS i’w chael yn y tudalennau hyn.

Gweler ein hadroddiad Blynyddol Amgylcheddol diweddaraf, ac Adroddiadiadau Cynnydd SDG.

Cysylltwch â Ni - Digwyddiadau Amgylcheddol

Os ydych yn sylwi ar unrhyw lygredd neu ddigwyddiadau amgylcheddol eraill yn y Brifysgol cofiwch adael i ni wybod yn syth trwy llenwi’r ffurflen Adroddiad Digwyddiad Amgylcheddol.

Cwestiynau Cyffredin a Gwybodaeth a Digwyddiadau Cynaliadwyedd o bob rhan o'r Brifysgol

Os oes gennych unrhyw syniadau neu awgrymiadau am berfformiad amgylcheddol gwell byth, ebostiwch environment@bangor.ac.uk. Ond edrychwch ar ein Cwestiynau Cyffredin Cynaliadwyedd yn gyntaf, rhag ofn bod gennym ni ddiweddariad eisoes ar bwnc y mae gennych ddiddordeb ynddo.

Rydym wedi rhestru llawer o ddigwyddiadau ac eitemau ymchwil o bob rhan o'r Brifysgol yn ymwneud â phynciau'r amgylchedd a chynaliadwyedd, edrychwch arnynt yma.

Yn Tachwedd 2022 lansiodd y Brifysgol ymgyrch gynaliadwyedd newydd ar gyfer staff a myfyrwyr.

Nod yr ymgyrch '25 erbyn 25' yw i leihau 25% o allyriadau erbyn 2025, er mwyn cyflawni hyn bydd y Brifysgol yn edrych ar sut mae'n defnyddio pob math o ynni a thanwydd, y gwastraff rydym yn ei daflu, y dŵr rydym yn ei ddefnyddio a bron unrhyw beth a phopeth sy'n creu allyriadau nwyon tŷ gwydr.

Dechreuodd 25 erbyn 25 ei weithgareddau gyda gwahoddiad agored i bob cydweithiwr a myfyriwr gynnig eu syniadau ar sut i gefnogi’r ymgyrch hon, gyda syniadau, meddyliau a mentrau ar sut y gall y Brifysgol leihau ôl troed carbon o fewn ein meysydd targed allweddol, sef ynni, gwastraff a theithio.

Wnaeth y logo 25 erbyn 25 yn ymddangos ar draws ein campws yr wythnos hon ar ffurf 'graffiti glân' sydd gobeithio wedi ennyn diddordeb yn yr ymgyrch!!

25 by 25 sustainability campaign logo

Safon y Byd

Mae Prifysgol Bangor ymhlith prifysgolion gorau'r DU ar gyfer perfformiad amgylcheddol a moesegol, fel y barnwyd gan Gynghrair Prifysgolion People & Planet. Mae'r cynghrair yr unig dabl gynhwysfawr ac annibynnol o brifysgolion y Deyrnas Unedig sy’n cael eu sgorio yn ôl perfformiad amgylcheddol a moesegol.

Yn 2022, llwyddodd Prifysgol Bangor i ennill gwobr o’r radd orau unwaith eto gan roi’r brifysgol yn yr 10% uchaf o holl brifysgolion y Deyrnas Unedig. Cynyddwyd sgôr y brifysgol o 8.5% gan gyrraedd safle 10 allan o 153 o brifysgolion.

Mae ymrwymiad parhaus y Brifysgol i gynaliadwyedd wedi cael ei gydnabod yn The Times Higher Education Impact Rankings. Yn 2023 roedd Bangor yn safle 16 yn y DU, ac yn 64 yn fyd-eang.

Mae The Times Higher Education Impact Rankings yn asesu dros 1,500 o brifysgolion o bob cwr o'r byd o ran y cynnydd a wnaed tuag at Nodau Datblygu Cynaliadwy’r Cenhedloedd Unedig. Caiff sefydliadau eu gwerthuso ym meysydd ymchwil, stiwardiaeth, allgymorth ac addysgu.

Buddsoddi er mwyn cynaliadwyedd

Mae ein Strategaeth Ystadau’n cael ei hadolygu ar hyn o bryd, a bydd yn cynnwys cynaliadwyedd fel ystyriaeth anhepgor wrth ddatblygu’r brifysgol yn y dyfodol. Mae datblygiadau a gwblhawyd mewn blynyddoedd blaenorol wedi ennill gradd 'Rhagorol' BREEAM gan gynnwys y canolfan Pontio, adeilad gwerth miliynau o bunnoedd, Canolfan Fôr Cymru ym Mhorthaethwy a “Phentref Myfyrwyr” y Santes Fair. Bwriedir gwneud gwaith datblygu sylweddol ar “Ardal Wyddoniaeth” y Brifysgol ar Ffordd Deiniol, tra bod Parc Gwyddoniaeth Menai yng Ngaerwen wedi cael ei gwblhau ym 2018.

Rydym hefyd yn cychwyn ar raglen effeithlonrwydd ynni uchelgeisiol “Buddsoddi er mwyn Arbed” wrth i ni geisio cyflawni ein hamcanion a’n targedau tymor hir. Mae enghreifftiau diweddar yn cynnwys goleuadau LED Garddwriaethol yn nhŷ gwydr Henfaes a’r tŷ gwydr Coffa, gosod wrinalau di-ddŵr, gosod pennau cawod dŵr-effeithlon yn ein neuaddau preswyl, a phrynu cherbyd trydan i gymryd lle faniau diesel yn fflyd cerbydau’r Gwasanaeth Campws. Os oes gennych awgrym am broject o’r fath, cysylltwch ag environment@bangor.ac.uk.

Darganfyddwch fwy...