Therapi Celf a Chefnogaeth Llesiant

Ym Mhrifysgol Bangor, mae'r Gwasanaeth Llesiant a Chynwysoldeb yn cynnig cymysgedd o weithgareddau llesiant a therapi celf i gefnogi eich iechyd meddwl. Gallwch ymuno â gweithdai a gweithgareddau sy'n canolbwyntio ar feithrin llesiant cadarnhaol, neu gymryd rhan mewn sesiynau therapi celf os hoffech ffordd fwy dwys a chreadigol o archwilio eich meddyliau a'ch teimladau. Mae'r ddau yma i roi lle i chi ofalu amdanoch chi'ch hun a chael cefnogaeth yn ystod eich amser yn y brifysgol.

Gall bywyd prifysgol fod yn gyffrous ac yn werth chweil, ond gall hefyd ddod â heriau ar hyd y ffordd. Dyna pam mae gofalu am eich llesiant meddwl wrth astudio mor bwysig - mae'n eich helpu i gael y gorau o'ch amser yn y brifysgol a mwynhau profiad myfyriwr mwy cadarnhaol. Mae meithrin y sgiliau a'r arferion hyn nawr hefyd yn golygu y byddwch yn fwy parod i ofalu am eich llesiant ymhell ar ôl i chi raddio.

Eich Cynghorydd Llesiant

Mae Cynghorydd Llesiant Prifysgol Bangor yn cynnig cefnogaeth ymarferol ac emosiynol i fyfyrwyr sy'n wynebu heriau bob dydd yn y brifysgol. P'un a ydych chi'n teimlo wedi'ch llethu, yn ynysig, neu angen rhywun i siarad ag ef, maen nhw yma i wrando, eich tywys a'ch helpu i reoli eich llesiant.

Yn unigryw, mae'r Cynghorydd Llesiant hefyd yn Therapydd Celf cymwys, sy'n cynnig:

• Ymyriadau creadigol, therapiwtig wedi'u teilwra i anghenion unigol
• Sesiynau therapi celf un-i-un
• Sesiynau grŵp sy'n annog mynegiant, cysylltiad a llesiant.

Maent hefyd yn cymryd rhan ragweithiol wrth hyrwyddo iechyd meddwl cadarnhaol, datblygu mentrau ataliol ac ymgyrchoedd llesiant i gefnogi'r gymuned fyfyrwyr ehangach.

Gall y Cynghorydd Llesiant hefyd eich cyfeirio at wasanaethau mewnol neu allanol perthnasol, gan sicrhau eich bod yn cael y gefnogaeth gywir pan fydd ei hangen arnoch.

Therapi Celf

Beth Ydyw?

Mae therapi celf yn fath o seicotherapi sy'n defnyddio creadigrwydd, fel darlunio, peintio, neu greu delweddau, i'ch helpu i archwilio'ch meddyliau, teimladau a phrofiadau. Nid oes angen unrhyw sgiliau celf arnoch i gymryd rhan, mae'n ymwneud â mynegiant yn hytrach na chynhyrchu celf "dda", a bydd y Therapydd Celf yn eich tywys a'ch cefnogi drwyddo draw.

Sut All Helpu?

Gall therapi celf roi lle diogel i fyfyrwyr reoli straen, pryder, neu hwyliau isel, a gall fod yn arbennig o ddefnyddiol os ydych chi'n ei chael hi'n anodd rhoi emosiynau mewn geiriau. Gall eich cefnogi i ymdopi â phwysau academaidd, heriau perthynas neu deuluol, profedigaeth, neu gwestiynau ynghylch hunaniaeth a hunan-barch. Mae llawer o fyfyrwyr hefyd yn canfod ei fod yn eu helpu i feithrin gwydnwch, datblygu strategaethau ymdopi, ac ennill mwy o hunanymwybyddiaeth, a all wneud gwahaniaeth gwirioneddol yn ystod ac ar ôl y brifysgol.

Beth Sydd ar Gael?

Gallwch gael mynediad at sesiynau therapi celf un-i-un naill ai'n bersonol neu ar-lein, ac mae sesiynau grŵp therapi celf hefyd ar gael ar adegau penodol yn ystod y flwyddyn. Cynigir hyd at with sesiwn un-i-un wythnosol, fel arfer rhwng 9yb ac 1yp o ddydd Llun i ddydd Gwener.

Ble?

Cynhelir sesiynau wyneb yn wyneb yn yr Ystafell Therapi Celf yn Neuadd Rathbone, Ffordd y Coleg, Bangor. Cynhelir sesiynau ar-lein ar Microsoft Teams.
Gwyliwch y fideo yma am fwy o wybodaeth:

Gweithdai Llesiant

Mae amrywiaeth o weithdai llesiant ar gael i helpu myfyrwyr i ofalu am eu hiechyd meddwl a'u llesiant. Wedi'u cyflwyno gan y Cynghorydd Llesiant, mae'r sesiynau hyn yn cwmpasu ystod eang o bynciau ac wedi'u cynllunio i ddarparu gwybodaeth ymarferol, canllawiau a strategaethau y gallwch eu defnyddio yn eich bywyd bob dydd.

Nod y gweithdai yw eich darparu â'r wybodaeth a'r modd i reoli straen, meithrin gwydnwch a gwella eich llesiant yn ystod eich amser yn y brifysgol.
Mae'r awyrgylch yn y sesiynau hyn yn gynnes, yn groesawgar ac yn gefnogol, gan roi lle diogel i chi ddysgu ac ymgysylltu.

Cysylltwch â Ni

Ebostiwch gwasanaethaulles@bangor.ac.uk neu ffoniwch 01248 388520 am fwy o wybodaeth neu i wneud apwyntiad.

Lawrlwythwch gopi o’n taflen Therapi Celf yma.

 

Beth sydd ar gael yn ystod blwyddyn academaidd 2025/26: Am y wybodaeth ddiweddaraf am therapi celf a gweithdai lles ar gyfer blwyddyn academaidd 2025/26, cymerwch olwg ar y llyfryn Sway Eich Llesiant.

Gweithgareddau a Mwy o Wybodaeth: Dysgwch fwy am Therapi Celf, ei hanes, beth ydyw, yr hyfforddiant sydd ei angen i ymarfer, lleoliadau gwaith therapyddion celf a gair gan ein therapydd celf Gwawr Wyn Roberts.  Gall cadw dyddlyfr gweledol fod yn ffordd dda o gefnogi eich ymarfer hunanofal, lawrlwythwch gopi o'n taflen waith yma i ddysgu mwy am sut i ddechrau dyddlyfr gweledol eich hun. Lawrlwythwch gopi o’n taflen celf ymdopi â newid – gorffen yn y brifysgol yma i’ch cefnogi pan ddaw’n amser gadael y brifysgol.  Lawrlwythwch gopi rhad ac am ddim o’r llyfryn ‘Adfyfyrio Drwy Gelf’ yma os yr hoffech ysbrydoliaeth i greu celf eich hun. Gall natur gael effaith gadarnhaol ar les, lawrlwythwch gopi o'n llyfryn Natur a Lles yma i ddysgu mwy am weithgareddau creadigol a all eich helpu i gysylltu â natur. Os byddwch yn mynychu therapi celf ar-lein darllenwch y daflen wybodaeth ddefnyddiol yma i’ch helpu i baratoi ar gyfer eich sesiynau. Dyma lyfryn gwaith ar gyfer myfyrwyr PhD sy’n edrych ar bwysigrwydd gwytnwch yn ystod y daith ddoethurol. Mae'n cynnwys gwybodaeth ddefnyddiol yn ogystal a chyfres o weithgareddau celf cefnogol: Gwytnwch mewn Ymchwil: Dulliau Creadigol ar gyfer Lles Meddyliol yn ystod y Daith Ddoethurol. Gwyliwch fideo byr (iaith Saesneg) Cymdeithas Therapyddion Celf Prydain am Beth yw Therapi Celf. Defnyddiwch ddulliau creadigol i’ch cefnogi yn ystod cyfnod asesiadau ac arholiadau, dilynwch yr awgrymiadau a’r gweithgareddau yn y llyfryn hwn.