Beth yw eich opsiynau o ran adrodd?

Os ydych wedi profi camymddygiad rhywiol, trais, aflonyddu neu ddigwyddiad casineb, mae nifer o opsiynau ar gael i chi.

Nid oes rhaid i chi wneud adroddiad er mwyn cael cymorth. Mae llawer o fyfyrwyr yn dewis siarad ag aelod o'r Tîm Ymateb i Ddatgeliadau (DRT) yn gyntaf fel y gallant ddeall yr opsiynau sydd ar gael cyn penderfynu a ydynt am gymryd unrhyw gamau pellach.

Mae cymorth ar gael ni waeth a ydych yn dewis gwneud adroddiad ai peidio.

 

Cyn Gwneud Adroddiad

Rydym yn annog myfyrwyr i siarad ag aelod o'r Tîm Ymateb i Ddatgeliadau (DRT) cyn gwneud adroddiad.

Gall aelod o'r DRT:

 

  • egluro'r opsiynau adrodd sydd ar gael;

  • trafod y cymorth sydd ar gael i chi;

  • ateb cwestiynau am weithdrefnau'r Brifysgol;

  • egluro pa wybodaeth a allai fod ei hangen; a

  • eich helpu i wneud penderfyniad gwybodus ynghylch unrhyw gamau nesaf.

 

Chi sy'n penderfynu a ydych yn dymuno gwneud adroddiad ffurfiol.

 

Adrodd i'r Brifysgol

Gall myfyrwyr wneud adroddiad pan fo'r pryderon yn ymwneud ag ymddygiad aelod presennol o gymuned y Brifysgol.

Gall hyn gynnwys pryderon sy'n ymwneud â:

 

  • chamymddygiad rhywiol;

  • trais rhywiol;

  • aflonyddu rhywiol;

  • aflonyddu;

  • stelcio;

  • cam-drin domestig;

  • ymddygiad gorfodol neu reolaethol;

  • digwyddiadau casineb; neu

  • ymddygiad arall a allai dorri polisïau'r Brifysgol.

 

Mae adroddiadau i'r Brifysgol yn cael eu rheoli gan y Tîm Achosion Myfyrwyr yn unol â pholisïau a gweithdrefnau perthnasol y Brifysgol.

Gall aelod o'r Tîm Achosion Myfyrwyr egluro'r broses, yr amserlenni a'r hyn a all ddigwydd ar ôl derbyn adroddiad.

 

Gwneud Adroddiad

Adrodd i'r Heddlu

Gall rhai digwyddiadau hefyd gyfateb i droseddau.

Gallwch ddewis adrodd digwyddiad i'r Heddlu, p'un a ydych yn penderfynu ei adrodd i'r Brifysgol ai peidio.

Mae gweithdrefnau'r Brifysgol ac ymchwiliad gan yr Heddlu yn brosesau ar wahân.

Os nad ydych yn siŵr a hoffech gysylltu â'r Heddlu, gall aelod o'r Tîm Ymateb i Ddatgeliadau drafod yr opsiynau sydd ar gael a'ch helpu i gael cymorth pellach.

Mewn argyfwng, ffoniwch 999.

Ar gyfer materion nad ydynt yn argyfwng, gellir cysylltu â'r Heddlu drwy ffonio 101.

 

Adrodd Pryderon am Rywun y Tu Allan i'r Brifysgol

Mae'r Brifysgol yn deall y gall profiadau o gamymddygiad rhywiol, trais, aflonyddu a chamdriniaeth ddigwydd o fewn a thu allan i gymuned y Brifysgol.

Mae cymorth ar gael ni waeth pwy oedd yn gyfrifol am yr ymddygiad.

Fodd bynnag, dim ond pan fo'r pryderon yn ymwneud ag ymddygiad aelod o'r Brifysgol y gellir defnyddio gweithdrefnau disgyblu'r Brifysgol.

Pan nad yw'r unigolyn a adroddir yn aelod o gymuned y Brifysgol, ni fydd y Brifysgol yn gallu ymchwilio na chymryd camau disgyblu. Yn yr amgylchiadau hyn, gall myfyrwyr gael cymorth o hyd a thrafod opsiynau adrodd eraill a allai fod ar gael.

 

Nid yw Pob Anghytundeb yn Gofyn am Adroddiad Ffurfiol

Mae'r Brifysgol yn cydnabod y gall anghytundebau ac anawsterau rhyngbersonol ddigwydd weithiau rhwng myfyrwyr.

Nid yw pob anghytundeb, anhawster mewn cyfeillgarwch neu berthynas sydd wedi chwalu yn dod o fewn cwmpas gweithdrefnau aflonyddu neu ddisgyblu'r Brifysgol.

Gall enghreifftiau gynnwys:

  • chwalu cyfeillgarwch;

  • anghytundebau rhwng cyd-breswylwyr;

  • dadleuon untro;

  • anawsterau mewn perthynas lle nad oes honiad o gamymddygiad; neu

  • anghydfodau lle mae gan unigolion gyfrifon gwahanol o'r hyn a ddigwyddodd.

Lle bo'n briodol, gall myfyrwyr gael eu cyfeirio at wasanaethau cymorth eraill, cymorth llety, gwasanaethau llesiant neu ganllawiau ar reoli gwrthdaro.

Os nad ydych yn siŵr a yw eich pryderon yn addas ar gyfer adroddiad ffurfiol, rydym yn eich annog i siarad ag aelod o'r Tîm Ymateb i Ddatgeliadau cyn penderfynu sut yr hoffech symud ymlaen.

 

Beth Sy'n Digwydd Ar Ôl i Mi Wneud Adroddiad?

Unwaith y bydd adroddiad ffurfiol wedi'i dderbyn (hynny yw, eich bod wedi gwneud datgeliad, wedi derbyn gwybodaeth am yr opsiynau adrodd sydd ar gael i chi, ac wedi penderfynu adrodd y mater yn ffurfiol), bydd y Tîm Achosion Myfyrwyr yn ystyried y wybodaeth a ddarparwyd ac yn penderfynu ar y camau nesaf mwyaf priodol yn unol â'r polisi neu'r weithdrefn berthnasol.

Bydd y Brifysgol yn egluro'r broses sy'n berthnasol i'ch adroddiad a'r hyn y gallwch ei ddisgwyl. Fodd bynnag, efallai y bydd cyfyngiadau ar y wybodaeth y gellir ei rhannu â chi am unrhyw gamau a gymerir. Mae hyn oherwydd bod yn rhaid i'r Brifysgol gydymffurfio â gofynion cyfrinachedd a diogelu data a sicrhau bod pawb sy'n rhan o'r broses yn cael eu trin yn deg.

Ni fydd y Brifysgol fel arfer yn ymchwilio i adroddiadau dienw, er y gellir defnyddio gwybodaeth a ddarperir yn ddienw i helpu i nodi patrymau ymddygiad neu lywio gwaith atal.

 

Angen Cymorth?

Nid oes rhaid i chi wneud adroddiad er mwyn cael cymorth.

Gall myfyrwyr gael cymorth gan:

 

 

Os nad ydych yn siŵr beth i'w wneud, rydym yn eich annog i siarad ag aelod o'r Tîm Ymateb i Ddatgeliadau yn y lle cyntaf.